Қазақстан елшілігінің ұйымдастыруымен Кеңес Одағының маршалы, КСРО-ның бұрынғы Қорғаныс министрі Дмитрий Язов жақында Мәскеудегі Бауыржан Момышұлы атындағы жалпы білім беретін № 229 орта мектепте болып, оқушылармен, ұстаздармен, Зеленоград қаласының басқа да тұрғындарымен кездесті. Панфилов дивизиясы жауынгерлерінің Мәскеу түбіндегі ерліктері жайында жиі айтып, деректі дүниелер жазып жүрген маршал Баукең мектебіне бұл жолы аты аңызға айналған тағы бір панфиловшы – қазақстандық Василий Клочков сынды саяси жетекшінің туғанына 100 жыл толуына орай өткізілген іс-шараға қатысу үшін келді. В.Клочковтың есімі соғыс жылдарында «Ресей кең байтақ, бірақ шегінетін жер жоқ, артымызда Мәскеу» деген сөздері арқылы танылғаны белгілі.
Мектеп ұстаздары майдангер маршалға қазақ батырының есімін иеленген білім ұясындағы жас ұрпақты патриоттық рухта тәрбиелеу бағытындағы жұмыстар жайында әңгімеледі. Ал маршал батырға арналған мұражайды аралап көріп, өзінің Бауыржан Момышұлын жақсы білетіндігі туралы айтты. Мұражайға жаңа кітабын сыйлады.
Кездесу барысында Д.Язов 1941 жылғы Мәскеуді қорғау шайқастарына кеңінен тоқталып, генерал И.Панфилов басқарған 316-атқыштар дивизиясының қаһармандық жолын, барша жауынгерлердің, соның ішінде Бауыржан Момышұлының ерлік еңбектерін жұртшылық жүрегіне жеткізе баяндады.
Қазір елшілік Отан соғысы басталуының 70 жылдығына орай жазылған Дмитрий Язовтың «Панфиловцы в боях за Родину» деп аталатын естелік кітабының жарық көруіне қолдау көрсетуде.
Серікқали БАЙМЕНШЕ.
Мәскеу