Өзара ықпалдастықтың өзекті мәселелері сөз болды

Кеше Астанада Қазақстан Республикасы  Сыртқы істер министрінің орынбасары Константин Жигалов НАТО Бас хатшысының Орталық Азия мен Кавказ бойынша Арнайы өкілі Джеймс Аппатурайды   қабылдады, деп хабарлады ҚР СІМ-інің баспасөз қызметі. Елбасы Нұрсұлтан Назар­баев­тың 2010 жылдың қазан айында НАТО-ның штаб-пәтеріне барған сапарымен НАТО-ның Бас хат­шысы Андерс Фог Расмуссенмен кездесуі Астана мен Брюс­сельдің өзара ықпалдасуының дамуына  ма­ңызды серпін бергені белгілі. Бұған сондай ақ өткен жыл­дың қараша айында Альянстың Лиссабонда болған Саммитінің де  айтарлықтай үлес қосқаны анық. Кездесудің қо­рытындысында екі жақты үнқа­ты­суды одан ары те­рең­детуге ұмты­лыс танытылды және екі жақты өзара іс-қимылды дамытудың нақ­ты жолдары нақтыланды. Нақ осы негізде К.Жигалов пен Дж. Аппатурай Қазақстан мен НАТО қарым-қатынасының қазіргі жағдайы мен даму перспектива­ларын және алдағы кезеңдегі ба­сымдықтар мен міндеттерді тал­қылады. Арнайы өкіл НАТО-ның Лиссабон Саммитінде қабылдан­ған жаңа Стра­те­гиялық тұжы­рым­дамасының іс жүзіне асырылу барысынан хабардар етті. Тараптар Қазақстан мен НАТО арасындағы әріптестіктің серпінді даму сипатына қанағат­та­натын­дықтарын білдіріп, бейбіт­ші­ліктің нығаюы, қауіпсіздік, өзара тиімді ынтымақтастықты дамыту тұр­ғысында пікір алмасты. Кездесуде тараптар Қазақстан Альянстың Орталық Азиядағы   ең өркенді әріптесі екендігін атап өтті. Бүгінде тараптар Қазақстан мен НАТО-ның 2012-2013 жыл­дар­ға арналған кезекті, Жеке әріп­тес­тік жоспарының үшінші айналымын жасауды бастады. Ал 2009-2011 жылдарға арналған екінші ай­налымын жүзеге асыру барысы ту­ралы келіссөздер мамыр айы­ның соңында Брюссельде  «НАТО-ның  28 мемлекеті + Қа­зақстан» пішініндегі кезекті мәжілісінде жал­ғастырылатын болады. Сонымен қатар, кездесуде  Ор­талық Азиядағы тұрақтылық және қауіпсіздік, Солтүстік Африка мен Таяу Шығыстағы жағ­дайлар барысы жайында толық­қан­ды пікір алмасу өтті. Әңгіме­ле­сушілер ауған проблемати­ка­сына да ерекше назар аударды. Қазақстан Үкіметі әуел бастан халықаралық қоғамдас­тық­тың Ауғанстандағы күш-жігерін бекем қолдап келді және қол­дау­ын жалғастыруда. Атап айтқанда, Қазақстанның 2010 жылғы ЕҚЫҰ-ға төрағалығы шеңберін­де­гі негізгі басымдықтарының бірі Ауғанстанда тұрақтылықты орнықтыру болғаны белгілі. Әңгіме барысында тараптар, сонымен қатар,  Қазақстанның ЕҚЫҰ-­ға төрағалығының нәти­желері, ШЫҰ-ға ағымдағы төр­ағалығы және алдағы ИКҰ-ға төрағалығы жайында ой бөлісті.