Оқушылардың он бір жыл бойы алған білімін сындарлы сынаққа салатын Ұлттық бірыңғай тест 4 маусым күні басталған еді. Биыл Отанымыз бойынша мектеп бітіріп жатқан 160 201 оқушының 129,471-і ҰБТ бойынша емтихан тапсыруға өтініш берген болатын. Олардың 85 372-і қазақ тілінде, 44 099-ы орыс тілінде білім алғандар. Тестілеу еліміздің 49 қаласы мен 105 аудан орталықтарында орналасқан пункттерде 4-10 маусым аралығында өткізілгенін назарға сала кетсек дейміз.
Тестілеу алғашқы күні 48, ал екінші күні 63 пунктте болды. Осы екі күнде 48 053 мектеп бітіруші сынақ тапсырды. Тағы бір еске салатын нәрсе, түлектер мамандықтар бойынша кемінде 50 балл жинауы тиіс. Сонда ғана олар білім грантын алатын республикалық конкурсқа қатыса алады.
Білім және ғылым министрі Бақытжан Жұмағұлов Алматы қаласында Ұлттық бірыңғай тестінің жұмысымен танысып, сынаққа қатысып отырған түлектерге сәттілік тіледі. Ол сонымен қатар, биыл ҰБТ-ның көп өзгеріске ұшырамағанын, тек 1500 сұрақтың мазмұнына сай болмағандықтан жойылғанын айтып, соңғы кездері емтиханның бұл түріне жұртшылықтың ден қоя бастағанын тілге тиек етті.
Өткен екі күнгі сынақтың нәтижесіне қарағанда, көрсеткіш жаман емес секілді. Дегенмен, 4 661 мектеп бітіруші шекті деңгейден өте алмай қалыпты. Ал ең жоғарғы 125 балл алғандар да бар көрінеді.
Сүлеймен МӘМЕТ.