Жуырда Алматыда Елбасы Нұрсұлтан Назарбаевтың үстіміздегі жылдың 17 сәуірдегі тапсырмасына байланысты, сондай-ақ Премьер-Министрдің бірінші орынбасары Өмірзақ Шөкеевтің және Жер ресурстарын басқару агенттігінің төрағасы Ө.Өзібековтің 2011 жылғы 20 сәуірдегі «Ауылшаруашылық жерлері ревизиясының мәселелері туралы» хаттамалық тапсырмасына сәйкес «Игерілмей және тиімсіз пайдаланып жатқан ауыл шаруашылығы мақсатындағы жерлерді анықтау жұмысының барысы туралы» алқалы жиын болып өтті.
Жиында жақында ғана Алматы облысы Талғар ауданы, Бесағаш ауылы маңындағы орын алған заңсыз жер басып алу фактісі тәрізді келеңсіз жәйттердің бұдан былай қайталанбауы үшін Елбасы тапсырмасын шұғыл арада жүзеге асыру жағы сөз болды.
Талғар, Іле, Қарасай, Еңбекшіқазақ, Жамбыл аудандары әкімдерінің орынбасарлары мен ондағы жер қатынастары басқармасы басшылары, сондай-ақ Алматы облысы әкімінің тікелей нұсқауымен құрылған арнайы комиссия мүшелері аталған отырыста күн тәртібінде тұрған осы өзекті мәселені қалай да оңды түрде шешу жөнінде өз ойларын ортаға салды.
Баяндамашы Алматы облысы және Алматы қаласы бойынша өңіраралық жер инспекциясы бастығының орынбасары Абдолла Жолдағұтов аталған игерілмей жатқан жерлерді мемлекет тарапынан реттеуге қатысты 5 түр бойынша сатылап жүзеге асырудың алгоритмін көпшілік назарына ұсынды.
Жиын соңында оған қатысушылар бірауыздан шешім қабылдап, алдағы уқытта осы бір түйіні қиын түйткілді мәселені шешуде «бір жағадан бас, бір жеңнен қол шығара» отырып бірлесе жұмыс істеуге келісіп тарасты.
Айнаш ЕСАЛИ, Алматы.