Кеше Ақордада Мемлекеттік хатшы Қанат Саудабаевтың төрағалық етуімен Президенттің жанындағы Азаматтық беру мәселелері жөніндегі комиссияның отырысы болып өтті.
Отырыста Қазақстан азаматтығын алғысы келген адамдардың өтініштері қаралды. Мемлекет басшысы Нұрсұлтан Назарбаев қол қойғаннан кейін Комиссияда өтініштері қаралған 23 мыңнан артық адам Қазақстан азаматтығын алатын болады. Түскен өтініштердің арасында ТМД елдерінен ғана емес, алыс шет елдерден келген адамдардың да есімдері көп. Осы мәселелер туралы Мемлекеттік хатшы өз ойын былай қорытты:
– Біздің еліміздің азаматтығын алуға әлемнің көптеген елдерінен өтініштер түсуінің өзі – Елбасы Нұрсұлтан Назарбаевтың жүргізіп отырған дұрыс саясатының арқасында Тәуелсіздігін алған 20 жылда Қазақстанның әлеуметтік-экономикалық және қоғамдық-саяси жетістіктерінің мойындалғанын көрсетеді. Біз Астана күні қарсаңында азаматтық алған жаңа отандастарымызды қуанышпен құттықтап, оларға денсаулық, табыс және жаңа Отанының кемел келешегі үшін жемісті еңбек етулерін тілейміз. Олардың ата-бабалары мекеніне тезірек бейімделуін қамтамасыз ету мәселелерін жылдам және ұйымдастырушылықпен шешу енді жауапты мемлекеттік органдардың міндеті.
Айта кететін дерек, Қазақстан тәуелсіздігін алғаннан бері жалпы саны 700 мыңнан артық шетел азаматтары өз ынтасымен Қазақстан азаматтығын алған. Соның басым бөлігі соңғы жылдардың үлесіне тиеді екен.
Жақсыбай САМРАТ.