Биылғы көктемдегі жойқын тасқын судан кейінгі Ақжайықтың бүгінгі тыныс-тіршілігі қандай екен деген сауал оқырмандарды селқос қалдыра алмаса керек. Иә, бүгінде мұнда табиғат апаты келтірген орасан мол шығынның орнын толтыру жұмыстары жүргізілуде. Соның айқын бір дәлелі Орал қаласында және Тасқала, Зеленов аудандарында кеңінен қарқын алған құрылыс дер едік. Бұған тек жергілікті мердігерлер тартылған. Облыс орталығында бүгінгі күні атқарылған құрылыс жұмыстарының көлемі 20-30 пайыз төңірегінде. Мақсат – алдағы жылыту маусымына дейін жаңадан тұрғызылған үйлерді пайдалануға беру.
Бұған дейін хабарланғанындай, Орал өңірінде бой көтеретін құрылыс жұмыстары үшін Үкімет тарапынан жеткілікті жерге қаражат бөлінген. Бүгінгі міндет оны тиімді, ұқыпты әрі үнемді түрде пайдалану болмақ. Осы орайда облыста орын алған биылғы күрделі жағдай мұнда құрылыс индустриясының да тезірек дамуына алғышарт қалады деп айтуға болады. Осылайша қазіргі құрылысқа жергілікті темір-бетон бұйымдары, плиталар мен блоктар пайдаланылуда. Құрылысты жүргізіп жатқан кейбір компаниялардың бұл материалдарды өздері өндіретіні де айтуға тұрарлық мәселе. Сондай-ақ үй қабырғаларын қалауға қажетті кірпіш те облыс орталығында шығарылады. Сонымен бірге мұндағы полиэтилен құбырлары зауыты ұжымының да мердігерлерге тигізіп отырған пайдасы мол.
Алайда аталған мәселеде кейбір кідірістер де жоқ емес. Айталық, құрылысқа аса қажетті материалдың бірі – цемент десек, ол Оралда өндірілмейді. Оның Қарағанды және Шымкент цемент зауыттарынан тасымалдап жеткізу ұзақ уақыт пен қосымша шығынды қажет етуде. Ал облыс аумағымен іргелес қоныстанған Ресейдегі «Вольский» цемент зауыты өз өнімдерінің бағасын отыз пайызға дейін өсіріп жіберген. Тағы бір жағдайда көршілес облыстардан қиыршық тас тиеп жеткізетін вагондар жетіспейді. Осылайша аталған мәселелерге Үкіметтің назар аудару қажеттілігі аңғарылады.
Облыста тасқын су зардабынан бүлінген үйлерге күрделі жөндеулер жүргізуге қажетті қаражат көздері де табылды. Бұл жөнінде Орал қалалық және Батыс Қазақстан облыстық мәслихаттарының сессиялары тиісті шешімдер қабылдады. Ақжайықта тұрғын үйлерге қоса әлеуметтік-тұрмыстық нысандар құрылыстары да қоса қанат жаюда. 1200 оқушыға арналған жаңа мектеп құрылысы кестеге сай жүруде. Әрқайсысы 290 орындық қос балабақшаның құрылысы жөнінде де осылай деуге болады.
Зеленов ауданының орталығы Переметный кентінде тұрғызылып жатқан үйлердің жанынан спорт алаңдары мен сауда үйлерін қоса салу жобаланған. Ең бастысы мұнда үлкен саябақ құрылысының бір мезгілде қолға алынғаны болашақ тұрғындарды үлкен қуанышқа кенелтуде. Саябаққа жергілікті жағдай мен климатқа бейімделген көшеттер мен ағаштар отырғызылмақ. Шағын да ықшам балалар қалашығы да саябақтың көрнекі жерінен орын теппек. Сондай-ақ осы арадан пошта бөлімшесі мен дәріхана ғимараты да бой көтермек.
Қысқасы, бүгінде батысқазақстандықтардың жүздері жарқын, еңселері биік. Олар биылғы көктемде бастарына үлкен қиындық түскен кезде баға жетпес қолдау көрсеткен мемлекет басшысы Нұрсұлтан Назарбаев пен республика Үкіметіне шынайы ризашылық сезімдерін білдіріп отыр. Бүгінде облыстың су тасқынына ұшыраған аймақтарында қоныс тепкен алып құрылыс алаңдары мен көкке мойнын созған сансыз крандар – сол қолдаудың көрінісі.
Темір ҚҰСАЙЫН.
Батыс Қазақстан облысы.