Мен өз өмірімде Елбасына, Президентке хат жазамын деп ойлап көрмеген едім. Бірақ, адам болған соң, тұйыққа тіреліп, алдыңнан қиындықтар, кедергілер кездесетін жағдайлар болады ғой. Бізге, кәсіпкерлерге тек жұмыс жасау керек, еліміздің дамуына өз үлесімізді қосып осы саланы дамытқымыз келеді. Шынын айту керек, кедергілер аз емес. Мысалы, өз басымнан қазір сондай жағдай өтуде. Қашыр ауданы орталығындағы астық сақтайтын кешенді сатып алып, бидай өсіретін жергілікті жердегі шаруа қожалықтарымен 2004 жылдан бастап жақсы жұмыс жасап келе жатыр едік. Былтырлары күтпеген жерден басым дауға қалды. Жеке кәсіпорынның жұмыс жасауына бөгет жасап, реті келсе, тартып алғылары келген жергілікті жердегі кейбір басшылармен, құқық қорғау орындарының заңсыз әрекеттерінен көз аша алмай қалдым. Содан амал жоқ, өз ісімнің ақтығы мен адалдығын дәлелдеу үшін Елбасына «Бизнесті қорғау» сайт жүйесі арқылы хат жаздым. Осыдан кейін-ақ, Мемлекет басшысы берген тапсырмаға орай кәсіпорын жұмысына, өзіме тосқауыл қоймақ болғандарға шара қолданылды. Бір тыныстап, еркіндеп қалдым. Рахмет, Сізге! Құқық қорғау орындары енді жұмыс жасауыма тыныштық берер деп ойлаймын. Кәсіпкерлер Сізге сенеді. Сіздің сеніміңізді ақтауға дайынбыз. Құрметті Елбасы, Сізді шын жүректен жақсы көреміз! Өзіңіз іргесін қалаған Астанамен бірге жасай беріңіз.
Қанат ШӘЙКЕНОВ, «Агротрейд» ЖШС директоры.
Павлодар облысы.