Астана күні мерекесінің мәдени іс-шаралар бағдарламасы аясында жыл сайын ұйымдастырылып, бүгінде дәстүрге айналған «Мыңжылдықтар тоғысындағы – Астана» атты көшпенділер өркениеті фестивалі өтуде.
Осымен төртінші рет өткізіліп отырған этноауыл биыл «Хан Шатыр» сауда, ойын-сауық кешенінің маңында орналасып, онда 50-ге жуық киіз үй тігілді. Олардың ішіне көшпенділердің тұрмыстық заттары, зергерлік бұйымдар, қолданбалы өнер туындылары, саятшылық және аңшылық өнердің бұйымдары қойылған. Көшпенді халықтың сонау сақ заманынан келе жатқан киім үлгілері фестиваль қонақтарының ерекше қызығушылықтарын туғызды. Ал арнайы жасақталған ауылдың дайындық сапасы ұлттық салт-дәстүр мен ырым-жоралардың көрсетілімдері мен эпос кештері арқылы ерекше айқындалып тұрды.
Төрт күн бойы «Хан Шатыры» пішіндес сахнада этникалық музыка мен күй кештері бір толастаған жоқ. Бір қызығы, ауылға келген қонақтар көшпенділер өміріне өздері араласып, оған тікелей қатысуға мүмкіндік алды. Мәселен, атқа мініп, үй тігу, киіз басу, құмыра жасау үдерістеріне араласуларына толық жағдай жасалған. Еуразияның жүрегінде орналасқан Астананы тамашалауға келген туристер мен өзге де қонақтардың құрметіне арнайы жолсеріктер дайындалғандығы тағы бар. Ауылға кіріп келген қонақты қазаққа тән қонақжайлығымен, ерекше сый-құрметпен қазақ, орыс, ағылшын тілдерінде халқымыздың тарихы мен мәдениеті жайлы әңгімелеп беретін қыздар мен жігіттер қарсы алып тұрды.
Ауыл іші, одан өзге қазақтың қыз ұзату, беташар, тұсау кесу, шашу, бесікке салу салт-дәстүрлерін, қазақтың ежелгі ұлттық киімдерімен таныстыратын театрландырылған қойылымдарды, айтыс пен көшпелі цирк өнерін тамашалауға да барынша жағдай жасалған. Бұл жөнінде осы шараның сценарийін жазған Гүлмира Салықбаева Астана күніне орай ұйымдастырылатын мерекелік шаралар Қазақстан Тәуелсіздігінің 20 жылдығын да қамтығандығын атап көрсетті.
«Ереуіл атқа ер салмай» деп аталатын фестивальдің алғашқы күні өткен ұлт-азаттық күресі жолындағы қойылымдар тақырып аясын толығымен қамтыған. Көшпенділер өркениеті фестивалінің ашылу салтанатын Голливуд киножұлдыздары мен көптеген шет елдерден келген қонақтар тамашалады. Шетелдік қонақтардың арасында ресейлік боксшы Николай Валуев, Голливуд жұлдыздарынан «Одиссей» фильмінің басты рөлін сомдаған Арманд Ассанте, Стивен Сигал, Майкл Мадсен, Мишель Родригес, ресейлік киножұлдыздар Сергей Светлаков сынды қонақтар бар.
Ұлттық мәдениет пен дәстүрді насихаттауға арналған шара бағдарламасы өте мазмұнды әрі жан-жақты қамтылған. Бұл жерден фестиваль көрермендері төл тарихымызға бір сәт ой жүгіртіп, ұлттық мәдениеттен сусындай алады. Астананың төріне тігілген ақ киіз үйлер қалашығы көшпенділер өмірінен алтыншы шілденің ымырт қараңғысына дейін сыр шертпек.
Жұлдыз БАЙДІЛДА.