Астананы кесіп өтіп, оның сұлулығын еселей түскен ерке Есілдің үстінде ата-аналар мен балаларды қайықпен қыдыртып, оның тылсым сырына саяхат жасатып, маусымдық демалыс сыйлайтын арнайы экскурсия екені белгілі. Жуырда экскурсиялық қызмет көрсету мекемесі жаңа маусымның ашылу рәсімін өткізіп, балғындарды бір қуантып тастады.
«Есіл Астана» мемлекеттік мекемесі айналысатын бұл демалыс орны биылғы жаңа маусымды үлкен сауапты іспен бастады. Бұлай деуімізге себеп, мүмкіндігі шектеулі 30 баланы тегін қыдырту осы істің үлкен жанашырлықпен басталғанын көрсетті. Құлдыраңдаған құлындар Есілдің бойын арнайы қайықпен Сарыарқа көшесі көпірі маңынан Ақордаға дейінгі аралықты шаттық көңілмен жүзіп өтіп, ұйымдастыру алқасына деген шексіз ризашылықтарын білдірумен болды. Балаларды бастап келген Психоневрологиялық әлеуметтік балалар мекемесінің директоры Серік Бөпежанов пен Астана қалалық жұмыспен қамту және әлеуметтік бағдарламалар басқармасының бастығы Алма Алтыбаева бұл игі бастаманың алғашқы маусымды мүгедек балаларға қуаныш сыйлаумен ашуы нағыз азаматтықтың белгісі екендігін айта келе, биылғы маусымда арнайы атбасын тіреген әрбір жанның жақсы демалуларына деген тілектестіктерін де назардан тыс қалдырмады.
– Күннен-күнге көркейіп, өркендеп келе жатқан ару Астанамызға қонақтар жылдан-жылға көптеп келуде. Бұл әсіресе, жаз айларында жиі көрініс береді. Біздің қызмет көрсетуіміздің негізі де осы маусымда болады, – деп бастады өз сөзін «Есіл Астана» мемлекеттік мекемесінің директоры Зейнолла Досмағамбетов. – Жалпы, мамыр айынан, яғни күннің жылуымен басталатын бұл жұмыс, қазан айының басына дейін халыққа қызмет көрсетеді. 60, 24 адамға лайықталған арнайы қайықтар осы уақыттар ішінде қала халқы мен қонақтарына қызмет көрсетуге дайын. Бұйырта, маусым-шілде айларында тағы да 3 қайық келеді деп күтілуде, – деді ол.
Өзен экскурсиясына қызығушылық танытып, табиғатты су бетінде тамашалауға деген халық ниеті жылдан жылға артып келеді екен. Оған дәлел, мәселен, бұл жерді алдыңғы жылы маусым аралығында 16 984 адам тамашаласа, былтырғы көрсеткіш 19 094 адамды құрағаны болып отыр.
Есіл өзенін жоғарыдағы келтірген бағыт бойынша саяхат жасауда, оны жол-жөнекей таныстырып отыруда зор еңбек сіңіретін маманның еңбегі де ұшан-теңіз. Осы ретте мекемеден екі маман құрақ ұшып қызмет етуге даяр. Сондай-ақ қауіпсіздік шараларын қамтамасыз етіп, адам өмірінің арашашысы қызметтерін абыроймен атқаратын төтенше жағдайлар қызметінің еңбектерін де ерекше атаған жөн. Сайып келгенде, мекеменің жалпы саны қырықтан аса қызметкерінің жұмысы халық үстінде. Қай кезде де демалушылар жағдайына басты назар аударатын мекеме жұмысының жеңіл емес екенін жіті көз жіберген былайғы жұрттың оның байқайтыны кәдік. Әйтсе де олар мұны өздерінің кәсібіне деген парызы деп санайтынын олардың елгезектене көрсетіп жатқан қызметтерінен байқау қиын емес.
Жаңа маусымның ашылуын тағатсыздана күтіп жүрген жандардың бірі көзін осы өзен бойында ашқан балғындар екен. Есілді жағалай жартылай жалаңаш жүгірген бір топ бала қайыққа мінген жоғарыда айтқан жеткіншектерге қызыға қол бұлғады. Әрине, баланың аты бала емес пе? Оларға бәрі де таңсық. Әсіресе, өздері күнде көріп жүрген қайықтан гөрі оларға жаңа тамашалаған жанның жүзіндегі қуанышты көру қызық. Мұның барлығы да алысты жақындатып, адамдарды бір-бірімен танысып-білісуде үлкен рөл атқарып жатқан осынау игі бастама мен еңселі елордамыздың арқасы екені даусыз.
Адам бойына сергектік келтіретін бірден-бір құрал, оның жақсы демалуы мен көңіл-күйдің орнықтылығы десек, Астанаға келген барша жанның Есіл бойын ерекше бір сезіммен тамсана тамашалауы аса қажеттілікті тудырары хақ. Ерке Есілдің жағасында қайықтағы шат-шадымен көңілді жандарды көргендегі ой осыны меңзейді.
Әбдірахман ҚЫДЫРБЕК.
Суреттерді түсірген Ағыбай АЯПБЕРГЕНОВ.