“Рахман ТБ” фермерлік шаруашылығының төрайымы Тастанова Ұлжалғасты тұрғыластары еркелетіп “біздің Зылиха Тамшыбаевамыз” дейді екен. Несі бар жақсы теңеу. Қазақта талантты жазушы, ақындар көп. Әбіш Кекілбаев, Мұхтар Мағауиндер сынды марқасқалары бар қазақ прозасы әлемдік биікке көтерілсе де, біреуді мақтау керек болса Ресейдің Шолоховына теңеп жатамыз. Ол деңгейден асып кетсе де. Қазақтың талантты бір қызы атақты Зылиха Тамшыбаеваның ізін басып жатса қуану керек.
Шардара тұрғай, Оңтүстікте жоқ кәсіпке, тәуекелдің жел қайығына мініп қант зауытын салмақ болып талаптанып жатқан аймаққа арнайы бардық. Бұрын-соңды Шардараға өткенде теңіз жақ қолтықта сары бел болып, тілім-тілімі шығып жататын адырдың бетіне жасыл бояу түскен. Тал-дарақтар көтерілген. Қант қызылшасы өсіріліп жатыр.
Аудан әкімі Марғұлан Марайым көп жылдар бойы кәсіпкерлікпен айналысқан. Кейін білгенін ғылыммен ұштастырған азамат. Біріккен Ұлттар Ұйымының Азық-түлік қауіпсіздігін зерттеу басқармасының анықтауы бойынша белгілі бір өнімнің 25 пайызын өз елінде өндіре алмаған мемлекет өзгеге кіріптарлықтан құтыла алмайды. Қазақстанда қантқа зәрулік үлкен. Кеңес Одағы кезінде жаманды-жақсылы жұмыс істеп тұрған оншақты зауыттың қазір үшеуі ғана қолданыста тұр. Соның бірегейі Ақсу қант зауытын сол кездегі Ақсу ауданының әкімі Қалимолда Байболов күн-түн қатып, зорға іске қосқаның білеміз, арнайы мақала жазғанбыз да. Бүгінде қант шаруашылығында мақтанатындай жағдай жоқ. Шикізат сырттан тасымалданады. Салыстырмалы түрде алсақ 3-5 пайыз ғана қант шығара аламыз, қалғаны сырттан әкелінеді.
Осының бәрін бағамдаған, зерттеген, жеті өлшеп бір кескен аудан әкімі кәсіпкер Ұлжалғас Тастановаға өтініш айтады. Түбінде қант қызылшасы көл-көсір пайда әкеледі, елдің бір жыртығын бүтіндейсіз деп.
Ұлжалғас Рахманқызы – 80 түтіннің бар үлесін бөліп беріп, екі тізгін, бір шылбырын қолына ұстатқан, бетіне қарап отырған кәсіпкері.
Тақырға дән өспейді. Салмақ салғанымен Марғұлан Марайым бас-көзге қарамай атқа жайдақ шабатын телпекбай емес.
Қазақ ауыл шаруашылығы институтының қант қызылшасы және оның өнімдерімен айналысатын бөлімінің профессор, академиктерімен ақылдасады, Шардараға шақырады. Жердің қант қызылшасын өсіруге бейім, бейім еместігін анықтайтын сынамасын алдырады. Бұл 2008 жылдардың ортасы еді. Шардараға арнайы шақыртумен Молдовия, Германия мемлекеттерінен ғалымдар ат шалдырады. Бәрі мақұлданғаннан кейін ғана Жаркенттегі жоғары сапалы қант қызылшасының ұрығын өсіретін “Қамқорлық” шаруашылығына тапсырыс беріледі.
Қант қызылшасы – тек қант қана емес. Одан кондитерлік, фармацевтикалық өнімдер айырылады, жеңіл өнеркәсіптің тынысын ашады. Қалдығы – бордақылауға қойған малдың қабырғасына сүбе байлайтын құнды азық. Түйіп айтсаңыз, ішкі нарықтың керегін қамтамасыз ететін, өзгеге жалтақтатпайтын, инвестицияны сыртқа шашпайтын өнім.
Елде жақсы іс көрсек, өзіміз жасап жатқандай қуанып, сүйінші сұрауға дайын тұратын басымыз оңтүстікте алғаш рет қант зауытын салғалы жатқан кәсіпкер келіншекке сүйсіндік.
Бұл – оңай тірлік емес екен. Сонау тоқсаныншы жылдардың ішінде ауылдар азып-тозып, елдің алды аудан орталығына баруға ақша таппай қысылғанда “етің тірі ғой, бізді өлтірмессің, үлесімізді қолыңа алып, тірлік жаса” деп 80 түтін сенген Ұлжалғас Тастанова өзіме сенген ағайынның қолын аққа жеткіземін деп пайдасы мол қант зауытын салуға тәуекел етіпті. Семей қаласында тоқтап тұрған қант зауытын сатып алып, Шардарадаға әкелген. Ташкенттен арнайы маман шақыртқан. Алматыдағы жеңіл өнеркәсіп институтының технолог-мамандарының мақұлдауын алған.
Әйтсе де күні ертең елдің аузын қазақстандық тәтті өнімдерге жеткізетін зауыт қаржы қиындығынан құтыла алмай тұр. Зауыт аяғынан толық жүріп кетуі, керек-жарағы үшін 16 млн. теңгедей қаражат керек. Былай қарасаң, ақшаның буына піскен бір қалталының шетелге бір шыққанда шашып қайтатын қаржысы. Зауыт алғашқы жұмысын бастап кетуге 8,5 млн. теңге болса да жетеді. Бірақ, «Максимум» аймақтық инвестициялық орталығы банкте «8 млн.-ға кепіл болатын дүниелеріңіз болса сұраған қаржыңызды береміз” дер.
Серіктестікте кепілге қоятындай 17 үй, 40 гектар суармалы жер, сыры ұшқан демесеңіз жұмыс істеп тұрған қант зауытының қондырғылары бар. Сауысқандай сақ, екі шоқып, бір қарап үйренген, талай рет ауыздары күйген банктер, инвестиция орталығы мұны дүние деп санамайды. Сонда қалай?
Елбасы шағын және орта кәсіп – экономиканың тіні. Көптеген мемлекеттерді дағдарыс жағдайында тоқтап қалған алып концерндер емес, осы шағын бизнес құтқарды. Біз де осы салаға басымдылық беруіміз керек дейді. Елдің болашағын ойлаған қаржы орталықтары күні ертең азық-түлік қауіпсіздігінің бір кемтігіне тығын болғалы тұрған бизнес жобасына көзілдірік астынан қарамай, батыл қолдаса болар еді.
Деп ойлаймыз ғой біз. Бірақ, “қаржы жоқ, шарам қайсы” деп отырған Ұлжалғасты көрмедік. “Қаржы табамын, күзге дейін зауытты іске қосамын” дейді. Жақсы тілек істейді.
Шардараға сапарда біраз шаруашылықтарды араладық. Жеке кәсіпкер К.Жұмабаевтың күріш ақтау зауыты іске қосылуға дайын. Қондырғысы жаңа, Швейцария технологиясы бойынша жұмыс жасайды.
Күріш – Шардараға таңсық емес. Кеңес Одағы кезінде бүкілодақтық рекордтар да алынған. Сұранысы жоғары болған. Ол өткен шақ.
Бүгіні – жақсы. Аудан әкімі күріш пен мақта дақылдарының көп жылдық табыстарын салыстырғанда күріштің пайдасы мол екенін айтады. Түбінде “ҚазАгроинновация” мекемесімен бірлесіп баяғы жоғары сортты күріштердің тұқымын айыратын күріш институтын ашпақ ниетте. Диқандар ынталы.
Жұмыс сапарында бізбен бірге Шардара ГЭС-нің президенті, облыстық мәслихаттың депутаты Құдайберген Ержанов бірге болды. Халық қалаулысы елге дегенде ерек тұратын азаматтардың бірі екен. Аудан әкімдігімен бірлесіп, ескі құрылыстардың есебінен жеті үй көтеруге көмектесіпті. Соның нәтижесінде жеті отбасында қоныс тойы тойланған. Шардарада елге керек дегенде белсеніп шығатын азаматтар көп. Ырыс алды – ынтымақ деген осы ғой.
Бақтияр ТАЙЖАН,
Оңтүстік Қазақстан облысы,
Шардара ауданы.