Қазақ ақпараттық кеңістігі тағы бір газетпен толықты.
1959 жылдан бері әрбір қазақ отбасының төрінен табылып, соңғы бір жарым жыл ішінде әртүрлі жағдайға байланысты жабылуға мәжбүр болған «Sport» газеті орыс тілінде шығатын «Спорт» апталығымен бірге қайта шыға бастады. Қос газеттің директор – бас редакторы белгілі қаламгер, Қазақстан Республикасына еңбек сіңірген қайраткер Несіп Жүнісбайұлы.
Газет аптасына бір рет, сейсенбі күні Астана қаласында шығады. Қазақ және орыс тілді газеттердің әрқайсысы 8 беттен тұрады. Газеттің тырнақалды нөмірінде қызықты да тартымды дүниелердің және оларға сай берілген әдемі суреттердің шыққанын атап өтуге болады. Басылымның бірінші бетінде «Спорт» газетін 1959 жылы тұңғыш шығарушылардың бірі Сайын Тұрсынов, грек-рим күресінен Олимпиада чемпионы Жақсылық Үшкемпіровтің газет ұжымына шығармашылық табыс тілеген сүйінші лебіздері берілсе, одан кейін «Таң қалдырған «Тур де Франс», «Қазақ спортының тұлғалары» айдарымен «Таусоғар», «Шиыршық атқан Шүменов... тағы бір қарсыласына таяқ жегізді», «Ел спортының ертеңі...» айдарымен «Абайды оқитын ару қыз», Олимпиадаға арналған «Тоғыз жолдама қолда. Өзгесі ойда...», «Алания»... алаң боп қалды» атты дүниелер жарияланған. Сонымен бірге «Бокс», «Қазақ күресі», «Футбол» айдарларымен басқа да қызықты материалдарды оқуға болады.