Жуырда шахматтан ел тәуелсіздігі мен Елбасы Жарлығымен Семей атом полигонының жабылғанына 20 жыл толуына және Астана күніне арналған сайыс өз мәресіне келіп жетті. Тартысты өткен бұл спорт мерекесіне «Невада – Семей» ядролық сынақтарға қарсы халықаралық қозғалысы, Семейдегі үкіметтік емес ұйымдар қауымдастығы және Курчатов қаласындағы Ядролық технологиялар паркі АҚ мұрындық болды.
Жарысқа қатысушыларға Премьер-Министрдің орынбасары, Қазақстан Шахмат федерациясының президенті Әсет Исекешев пен «Невада – Семей» ядролық сынақтарға қарсы халықаралық қозғалысының президенті, ақын Олжас Сүлейменовтің атынан келіп түскен құттықтау хатын аталған қозғалыстың вице-президенті Сұлтан Картоев оқып берді. Шахматтан өткен біріншілікті алғашқы жүрісті жасап, ашу құрметі «Ядролық технологиялық паркі» акционерлік қоғамының президенті Абзал Құсайынов пен Абайдың жиені, республикалық Абай қорының президенті Балтабек Ерсәлімұлына ұсынылды.
Қаладағы шахмат клубында өткен осындай мерекелік жарысқа жастары 8 бен 80 аралығындағы қырыққа жуық белді ойыншылар қатысты. Олардың арасында әлем біріншілігіне қатысқан Сергей Смотров сынды белгілі шахматшы мен 10 спорт шеберлігіне кандидаттың болуы көп нәрсені аңғартса керек. Бірнеше күнге созылған тартысты ойын нәтижесінде лайықты жеңімпаздар анықталып, сый-сияпатқа бөленді.
Қос жиырма жылдық мереке тақай түскен сайын Семейде осындай мазмұндағы сайыстар мен жарыстар жиі өткізілуде.
Дәулет СЕЙСЕНҰЛЫ,
Семей.