Елбасы, «Нұр Отан» партиясының Төрағасы Нұрсұлтан Назарбаев жастардың мәселелерін басты назарында ұстап, олардың Қазақстан дамуындағы көшбасшылық рөлін үнемі атап келеді. Сондай-ақ жастармен жұмыс «Нұр Отан» қызметінің басты бағыттарының бірі болып табылады.
Кеше өткізілген «Нұр Отан» партиясы Төрағасының бірінші орынбасары Нұрлан Нығматулиннің жастар ұйымдары мен одақтарының көшбасшыларымен, жас кәсіпкерлермен және партиялық жобалардың қатысушыларымен кездесуі барысында осы және басқа да бағдарламалар, сонымен қатар, жас буынды толғандыратын маңызды мәселелердің болашағы жайлы сөз болды. Халықаралық жастар күні қарсаңында өткізілген бұл кездесу Қазақстан Тәуелсіздігінің 20 жылдығына орайластырылды.
Кездесуге қатысушылар алдында сөз алған Нұрлан Нығматулин Елбасымыз, «Нұр Отан» партиясының Төрағасы Нұрсұлтан Назарбаев жас тұлғаның үйлесімді дамуына барынша жағдай жасап келе жатқанын атап өтті. Бүгінгі күні жас қазақстандықтар да Қазақстан дамуына зор үлес қосуда. Олар елдің қоғамдық-саяси өміріне де, үдемелі индустриялық-инновациялық бағдарламаны жүзеге асыруға да, ғылыми-зерттеу жұмыстарына да атсалысуда.
Кездесу қызықты әрі мазмұнды өтті. Бағдарламаға қатысушылар олардың маңыздылығы мен уақытылы өткізілгендігін атап көрсетті. Себебі, жобалардың әрқайсысы ең алдымен еліміздің жас буынының дамуына, оған қолдау көрсетуге және жастардың өз мүмкіндігін толық пайдалануына арналған. Тек бір ғана республикалық «Дипломмен – ауылға» партиялық жобасына мыңдаған жас мамандар атсалысты. Жалпы, жоба іске асырыла бастаған уақыттан бері 13 мыңнан астам жас ауылға қызмет ету үшін келді.
«Егемен-ақпарат».