Депутаттардың қоғамдық қабылдауы

Парламент Мәжілісінің депутаттары Нұр­­лан Әбдіров пен Виктор Рогалев Қызылжар өңірінде бірнеше күндік жұмыс сапарымен болып, жұртшылықпен кездесулер, қоғам­дық қабылдаулар өткізеді. Аудандарды, ме­ке­ме-кәсіпорындарды аралап, тыныс-тір­ші­лі­гімен танысты. Халық қалаулыларының кездесулері түрлі бағыттарда өрбіп, ашық пікірлесуді басты мақсат етті. Алғашқы күні депутаттарды облыс әкімі Серік Біләлов қабылдап, өңірдің әлеуметтік-экономикалық дамуы, алдағы кезек күттірмес міндеттер жайлы толыққанды мағлұмат берді. «Нұр Отан» ХДП жергілікті филиа­лын­да­ғ­ы жүздесуде заңдарды жетілдіру, сы­байлас жемқорлыққа қарсы күресті күшейту, жаңа жұмыс орындарын ашу секілді өзекті мәселелер төңірегінде байыпты әңгіме қоз­ғалды. Ал қоғамдық қабылдауға келген за­ғип­тар қоғамының төрағасы Минвали Ғаби­денұлы көзінен, құлағынан, тілінен ай­рыл­ған кемтар жандарға мемлекеттік жәрдемақы тағайындалғанда балалары да ұмыт қалмаса деген өтініш айтса, Петерфельд ауылынан ат басын тіреген Айсұлу Есентемірова ден­сау­лық сақтау саласында өзгерістердің жасалып жатқанына қарамастан, қажетті дәрі-дәр­мек­тің дәріханалардан табыла бермейтінін қын­жылыспен жеткізді. Ол мүгедек баласымен ауруханаға жиі түсетінін, жатын орын мен тамақтың қымбаттылығына, алдағы уақытта асырауында мүгедек балалары бар аналар мен отбасылар үшін заңға жеңілдіктер қабылдау қажеттігіне назар аудартты. Шал ақын ауданының тұрғыны Мәлік­за­да Апаханов сонау алыс жерден өз мұңын ай­та келіпті. Осыдан бірнеше жыл бұрын иессіз тұрған үйді жөндеп, жайлы қоныс еткенімен әлі күнге дейін жарық мәселесі шешілмей келеді екен. Жергілікті шенеу­нік­тердің есігін талай тоздырыпты. Баспананы өз атына рә­сім­деу мәселесі де тығырыққа тірелген кө­рі­неді. Мәжіліс депутаттары қолдарынан кел­ген­ше көмектесуге уәде етті. Бұл күні қоғам­дық қабылдау үйінде тыным болған жоқ. Әлеу­меттік көмек, жалақы, құқықтық сауат­ты­лық, білікті мамандар даярлау секілді тақы­рыптар төңірегінде де келелі пікірлер алмасылды. Облыстық экономикалық қылмыс пен сы­байлас жемқорлыққа қарсы күрес жөнін­дегі департаменттің және прокуратураның жеке құрамымен өткен кездесулер де тиімді болды. Өмір ЕСҚАЛИ, Солтүстік Қазақстан облысы.