Ертең – Көлік және байланыс қызметкерлерінің күні
Барыс бейнелі болашағымыздың баянды болуы ел экономикасының қан тамыры – көлік саласының жүйелі де табысты жұмысына тікелей байланысты екендігі белгілі. Жаһандық дағдарыстан тоқыраусыз шығып, дуалы ауыз әлемдік сарапшылардың пікірінше, қарқынды даму даңғылына түскен Қазақстанда іс жүзіне асырылып жатқан үдемелі индустриялық-инновациялық бағдарламаның болашағы да осы саланың жұмыс ырғағына байланысты өріс алып келеді. Ертең өздерінің дәстүрлі кәсіби мерекесін атап өткелі отырған республикамыздың көлік саласы қызметкерлерінің бұл ретте атқарып жатқан жұмыстары ауқымды, белгілеген межелері биік. Қазіргі таңда ел экономикасының қаншалықты дәрежеде алға басып отырғандығын Қазақстанның әртүрлі көлік саласындағы кәсіпорындарының қол жеткізген жетістіктерінен де айқын аңғаруға болады. Атап айтқанда, ағымдағы жылдың бірінші жарты жылдығында 1,08 миллиард тонна жүк тасымалданып, 2010 жылдың сәйкес мерзімімен салыстырғанда бұл көрсеткіш 19,9 пайызға артқан. Жүк айналымы өткен жылдың сәйкес мерзімімен салыстырғанда 12,1 пайызды құрап, 144,4 миллиард тонна шақырымды құраған. Тасымалданған жолаушылар саны 26,4 пайызға артып, 7,174 миллиард жолаушыны құраған. Жолаушылар айналымы 80,1 миллиард жолаушы шақырымға жетіп, өткен жылдың сәйкес мерзімімен салыстырғанда 25,6 пайызға өскен. Мемлекет басшысының тікелей тапсырмасымен соңғы жылдары елімізде автомобиль көлігі жолдарын жаңғырту және жаңа күре жолдар салу мәселесінде де бұрын-соңды болмаған бетбұрыс басталды. Мәселен, ағымдағы жылы жалпы пайдаланымдағы автокөлік жолдарын дамытуға 286,9 миллиард теңге қаржы қарастырылып отыр. Осы мақсатпен жалпы пайдаланымдағы, оның ішінде жергілікті жүйедегі 5 179 шақырым автокөлік жолдары күрделі жөндеуден өткізілмек. Биылғы жылы еліміздегі республикалық дәрежедегі автокөлік жолдарын дамытуға бюджеттен 221,5 миллиард теңге қаржы бөлінді. Оның ішінде 194,5 миллиард теңге жаңа жолдар құрылысын салуға және қайта құруға бөлінсе, 27,0 миллиард теңге күрделі және ағымдағы жөндеу жұмыстарын жүргізуге бөлінген. Бұл қаржыға Алматы – Астана – Петропавл, Самара – Шымкент, Омбы – Майқапшағай, Астрахань – Атырау – Ақтау – Түркіменбашы, Ташкент – Шымкент – Алматы – Қорғас, Ақтөбе – Мортық, Астана – Қостанай – Челябі, Таскескен – Бақты және Щучье – Бурабай бағытындағы 912 шақырымға созылатын автокөлік жолдары қайта жаңартылмақ. Сонымен бірге биылғы жылдың соңына дейін елімізде 359 шақырым жаңа жол құрылысы пайдалануға беріліп, 1238 шақырым автокөлік жолдары күрделі және орта жөндеу жұмыстарынан өткізілмек. 2011 жылы жергілікті маңыздағы 3029 шақырым автокөлік жолын дамытуға 65,4 миллиард теңге қаржы бөлінді. Үстіміздегі жылдың бірінші жартыжылдығында республикалық жүйе бойынша бөлінген қаржының 46,2 миллиард теңгесі игеріліп, 308 шақырым жол салынды және қайта жаңартылды. 319 шақырымға созылған автокөлік жолы жөндеуден өткізілді. Ғасыр жобасы атанған «Батыс Еуропа – Батыс Қытай» халықаралық көлік дәлізінің құрылысы жоғары қарқынмен басталып кетті. Бұл халықаралық көлік дәлізінің 2787 шақырымы Қазақстан аумағына жатады. Қазір еліміздің 4 облысы аумағындағы 1615 шақырымға созылған халықаралық көлік дәлізінің құрылыс жұмыстары жүргізіліп жатыр. 2010 жылы осы маңызды жол құрылысына 90,5 миллиард теңге қаржы бөлініп, 417 шақырым жол құрылысы салынды. Биылғы жылы бұл мақсатқа 155,5 миллиард теңге қаржы бөлінген. Осы қаржыға 730 шақырым автокөлік жолының құрылысын салу жоспарланған. Экономиканың күретамыры аталатын темір жол саласында да атқарылып жатқан жұмыстар мен қол жеткізген нәтижелер баршылық. Үстіміздегі жылдың бірінші жартыжылдығында темір жол көлігімен 133,6 миллион тонна жүк тасымалданып, жүк айналымы өткен жылдың сәйкес мерзімімен салыстырғанда 3,5 пайызға артып, 102,9 миллиард тонна шақырымды құраған. Еліміздің теміржолшылары болат жолды одан әрі дамыту мақсатындағы ірі жобаларды да жүзеге асыруда. Бұл ретте «Өзен – Түркіменстан мемлекеттік шекарасы» және «Жетіген – Қорғас» бағыттарында салынып жатқан темір жол тораптарын ерекше атап айтуға болады. «Өзен – Түркіменстан мемлекеттік шекарасы» бағытындағы 146 шақырымға созылған жол торабы құрылысын салуға 65 миллиард теңге қаржы қарастырылып отыр. Қазір мұнда 1,6 мың адам және 450 жол құрылысы техникалары уақытпен санаспай еңбек етуде. «Жетіген – Қорғас» бағытындағы 293 шақырымға созылған жол торабы құрылысын салуға 154 миллиард теңге қаржы бөлінді. Үстіміздегі жылдың 12 шілдесіне дейінгі дерек бойынша бұл жол торабының 83,6 шақырымы салынып, 22,3 мың текше метр топырақ үйіндісі жасалған. Жол торабын электр қуатымен қамтамасыз ету үшін 15257 электр бағаналары орнатылып, 286 суағар құбырлар төселген. 24 көпір құрылысы басталған. Мұнда 4,3 мың адам құрылыс жұмыстарымен айналысуда. Еліміздің темір жол саласын жаңа техникалармен жарақтандыру мақсатында да жүйелі жұмыстар жүргізілуде. Мәселен, биылғы жылдың өзінде 602 жүк вагоны, 27 локомотив және 22 жолаушылар тасымалдайтын вагондар сатып алынған. Астана қаласындағы локомотив құрастыратын зауыт биылғы жылы 86 жаңа локомотивке жолдама бермек. Екібастұз қаласындағы жүк вагондарын шығаратын зауыт жыл басынан бері 70 жартылай вагондар шығарып, жыл аяғына дейін оның санын 545-ке жеткізбек. Петропавл қаласындағы жүк вагондарын шығаратын зауыт бірінші жартыжылдықта 320 жүк вагонын рельске қойған. Республикамыздың әуе компаниялары ағымдағы жылдың бірінші жартыжылдығында 1,8 миллион жолаушы, 14,7 мың тонна жүк тасымалдады. Өткен жылдың сәйкес мерзімімен салыстырғанда бұл көрсеткіштер тиісінше 23,7 және 18,5 пайызға артқан. Отандық әуе компаниялары қолданыстағы әуе кемелерін жаңарту және жаңғырту мәселелеріне де ерекше көңіл бөліп келеді. Мәселен, биылғы жылы «Эйр Астана» АҚ лизингке Embraer EMB-190 әуе кемесін сатып алса, «Скат» және «Дета Эйр» АҚ-тары жеке меншіктеріне тиісінше Боинг-757 және Боинг-737 әуе кемелерін иеленді. Ал «Еуро-Азия Эйр» АҚ лизингпен МИ-8Т маркалы екі тікұшағын, «Қазавиа» МИ-8ПС, «Семейавиа» АҚ лизингпен Embraer EMB-145 әуе кемесін сатып алған. Тәуелсіздік жылдарында дүниеге келген отандық теңіз айлақтары да толымды табыстарымен көрініп келеді. Мәселен, Ақтау теңіз айлағында ағымдағы жылдың алты айы ішінде 4,311 миллион тонна мұнай, 1,097 миллион тонна жүк тасымалданса, паромдық жүк тасымалдау көрсеткіші 651,1 тоннаны құрап, өткен жылдың сәйкес мерзімімен салыстырғанда 126,3 пайызға артты. Мемлекеттік техникалық флотты жаңғырту бағдарламасы шеңберінде 2011 жылы жаңадан 5 кеме сатып алынбақ. Сонымен бірге елімізде тағы да 9 кеменің құрылысы жүргізіліп жатыр. Кәсіби мерекелерін осындай толымды табыстармен қарсы алып отырған еліміздің көлік саласы қызметкерлерінің тәуелсіздігіміздің 20 жылдығы аталып өтетін желтоқсан айына дейін белгілеген межелері де биік. Әрбір қазақстандық үшін қастерлі де қадірлі күн болып саналатын Тәуелсіздік мерекесінің 20 жылдығы көлік саласы қызметкерлерінің толайым тартуларымен ерекшеленбек. Еліміздің әлеуметтік-экономикалық өміріне жүйелі түрде қан жүгіртіп отырған көлік саласы қызметкерлерін төл мерекелерімен құттықтай отырып, еңбектеріне табыс тілейміз. Жылқыбай ЖАҒЫПАРҰЛЫ.
•
06 Тамыз, 2011
Толассыз тасымалдар, толайым табыстар
376 рет
көрсетілді