Кеше Астанада Қазақстан халықтық коммунистік партиясы орталық комитетінің қоғамдық тыңдалымдары өтті. Оған аталған партияның еліміздің әр өңіріндегі белсенді мүшелері қатысты.
Күн тәртібіне бірнеше мәселелер қойылды. Олардың ішінде тұрғын үй-коммуналдық шаруашылығының жұмыстары, коммуналдық қызметке төлемдер, қоғамдық көліктерде жүру ақылары сынды мәселелер талқы таразысына түсті. ҚХКП ОК бірінші хатшысы Владислав Косаревтің айтуынша, қоғам мемлекеттік органдарға елдегі монополистердің бағаны тым шарықтатып жіберу үдерісімен күресуге көмектесуі қажет. Бұл жерде халықтың күш-жігері айтарлықтай маңызға ие болмақ.
– Бүгінгі отырыс барысында қызықты ұсыныстар мен пікірлер айтылды. Біз олардың барлығының басын бір құжатқа біріктіретін боламыз. Одан кейін аталған құжатты тиісті органдарға, сондай-ақ, Үкімет пен Мемлекет басшысының назарына тікелей ұсынғалы отырмыз. Сол арқылы ел ішінде жаңа өзгерістердің орын алғанын көздемекпіз. Себебі, мұндай қадамдар ең алдымен, қаржылық ресурстардың тиімсіз пайдаланылуына шектеу қоюға мұрындық болады. Екіншіден, коммуналдық тарифтерді жөнсіз жоғарылату керек пе, жоқ па деген сауалға жауап іздеуге сеп болмақ, – деді В.Косарев. – Бұл ретте, біз аталған қызмет түрлеріне бағаның өсірілуіне қатысты 2 жылдық мерзім көлемінде мораторий жариялауды ұсынамыз.
В.Косаревтің пікірінше, коммуналдық монополистер өзінің жұмысына ақы алу үдерісін жүргізуде ешқандай шеңберге сыймайтын, кейде заң талаптарына сәйкес келмейтін саясатты басшылыққа алуды әдетке айналдырған. Осы орайда, партияның бірінші хатшысы мұндай заңсыз үдерістерге бағытталған мораторийді республикалық көлемде өткізу қажеттігіне тоқталып өтті. Сондай-ақ, ол қазақстандық азаматтарды заң талаптарына қайшы әрекет ететін халыққа қызмет көрсету мекемелерінің жұмысына бірлесе тосқауыл қоюға шақырды.
«Егемен-ақпарат».