Оңай жолмен пайда табуға құмартып, қылмысқа баратындар тепсе темір үзетіндердің ғана емес, мүгедек жандар арасында да кездесуде. Алматы қаласының 43 жастағы тұрғыны Мұрат Есенов бірінші топтағы мүгедектігіне қарамай, қылмыстық әрекеттермен айналысуды әдетке айналдырған. Ол Алмалы ауданында тұратын таныстарын да және өзгелерді де «арзан бағамен» ноутбук алып беремін, сөйтіп сендер біршама ақшаларыңды үнемдейсіңдер» деп, бірқатар қаражат жинап алған. Жарты жылдан астам уақыт өзгелерді құрғақ уәдемен тойдырған алаяқ жақында құрықталды. Мүгедек адамға мүсіркеушілікпен қарап, оның өздерін алдамайтынына сенген жандар болса оған берген қомақты қаражатын қайтара алмай әлек.
Екі балдақпен әзер қозғалатын мүгедек-айыпкерден жауап алу кезінде бірқатар көлеңкелі жәйттің беті ашылды. Ол өзгелерден алаяқтық жолмен алдап алған ақшаны түгелдей дерлік есірткі сатып алуға жұмсағанын айтты. Таңғаларлығы, осындай өрескел ісіне қиналып, қынжылып, өкініш те білдірмейді. Сөйтсе он жыл бойы есірткімен әуестенген Мұрат Есенов бұдан бұрын да есірткі сату және ұрлау жөніндегі қылмысы бойынша жеті рет жауапқа тартылып, сотталған, – дейді Алмалы аудандық ІІБ бастығының орынбасары, полиция подполковнигі Болат Мұханбетов.
Бақыт БАЛҒАРИНА, Алматы.