Соколов-Сарыбай кен байыту өндірістік бірлестігінің жылу – энергетикалық орталығында болған жарылыстан екі адам оқиға орнында ажал құшты, үш жұмысшыға медициналық көмек көрсетілуде. Апат жылу-энергетикалық орталықтың №1 қазандық цехындағы редукторлық-салқындату қондырғысының төменгі бөлігіндегі жарылыстан болған.
Нәтижесінде атқылаған бу күш алып кетіп, әкімшілік және тұрмыстық ғимаратқа өткен. Ондағы жылу-энергетикалық орталығы мен қарағандылық турбо-механикалық зауыты жұмысшылары тұрған жерге дейін жайылған. Ыстық будың құрсауында қалған жұмысшылар түрлі деңгейде жарақат алған.
Оқиға орнына «ССКӨБ» АҚ қарасты Фабриканың өрт сөндіру қызметкерлері, Рудныйдағы әскерилендірілген тау-кен құтқару командасы шақырылған. Мамандар ЖЭО мен ҚТМЗ жұмысшыларын қауіпті аймақтан алып шықты. Қазір оқиға орнында апаттың салдарын тексеру жұмыстары жүргізілуде.
«ССКӨБ» АҚ, Еуразиялық Топ басшылары ЖЭО-ның қаза тапқан кеңсе сыпырушылары Б.К.Базарбаева мен С.В.Щербакованың отбасы мен жақындарына көңіл айтты. Компания тарапынан марқұмдардың отбасы алдындағы барлық міндеттемелер заң бойынша орындалатын болады.
Нәзира Жәрімбетова, «Егемен Қазақстан».