Мексикалық Сауль «Канело» Альварестің (48-1-1, 34 КО) промоутері Оскар Де Ла Хойя 2017 жылы қазақстандық Геннадий Головкинмен (36-0, 33 КО) міндетті түрде жекпе-жек ұйымдастыратынын мәлімдеді. Бұл туралы vesti.kz хабарлады.
«Альварес 160 фунтқа дейін салмағын көтеріп, Головкинмен жұдырықтасады. Ол GGG-дан жасқанады деп айта алмаймын. Бұл айқас келесі жылы өтетініне кепілдік ретінде промоутерлік лицензиямды қоюға дайынмын», – деп ESPN телеарнасына сұхбат берді.
Айта кетейік, қос боксшының арасындағы кездесу биыл өтуі тиіс болатын. Алайда, мексикалық орта салмақтағы өзінің WBC титулын жекпе-жексіз Головкинге берді. Бұған қарамастан екі тарап әлі де болсын бұл айқастың орын алатынын хабарлап тұрады. Алдын ала болжам бойынша 2017 жылдың қыркүйек айында өтуі мүмкін.