Егемен еліміздің жиырма жылдық тарихында жойқын су тасқыны тұңғыш рет биыл Орал өңірінде тіркелді. Жас та жаңа мемлекеттің құрсағынан шыққан төтенше жағдайлар жөніндегі құрылымдар да айтып келмеген мұндай табиғат апатымен тұңғыш рет беттесіп, оны ауыздықтай білді. Тасқынның аймаққа келтірген орасан зор шығындары жөнінде баспасөз бетінде бұған дейін де жеткілікті жазылды. Сондықтан оған тоқталмай бүгінде су астында қалған Зеленов және Тасқала аудандарының орталықтарында жаңа қалашықтар салынып пайдалануға берілгенін айтқымыз келеді.
Шағаладай сап түзеген мұндай қалашықтар жаңа атауларға ие болып та үлгерді. Тақырыпқа шығарып отырғанымыздай оған Зеленовта Мұнайшы атауы берілді. Ал облыстың батысындағы Ресей Федерациясымен шектесетін Тасқала кентінде қоныс тепкен қалашыққа осы топырақтың төл перзенті, өмірінің соңғы күндеріне дейін осы өңірде тұрған, Жеңістің 65 жылдық мерекесі қарсаңында өмірден озған Кеңес Одағының Батыры Садық Жақсығұловтың есімі берілді.
Бейнебір ертегідегідей өте қысқа уақыт аралығында бой көтерген қалашықтар тек бір- өңкей тұрғын үйлер тізбегінен тұрмайды. Жобалау-сметалық құжаттарға сәйкес сонымен бір мезгілде сауда орталықтары, дәріхана, пошта бөлімшелері, халыққа қызмет көрсету нысандары да ірге көтерген. Аталған қалашықтардың салтанатты түрде ашылу рәсімі кезінде Батыс Қазақстан облысының әкімі Бақтықожа Ізмұхамбетов өз ойын былайша тарқатты: Бұл Елбасымыз Нұрсұлтан Назарбаевтың тікелей тапсырмасымен Үкіметтің дер кезінде көрсеткен көмегінің, барша қазақстандықтардың қолдауының нәтижесі. Бүгін облыс аудандарында пайдалануға берілген тұрғын үйлер мен әлеуметтік-тұрмыстық нысандардың әрқайсысында әрбір отандасымыздың үлесі мен жүректерінің жылуы бар.
Сырт көз – сыншы дегендей, газет тілшісіне өз ой-пікірін Тасқала ауданымен көршілес Ресейдің Саратов облысы, Озинки ауданының басшысы Антонина Галяшкина төмендегіше түйіндеді.
– Мен кеңестік кезеңде биылғы көктемде су тасқынына ұшыраған Зеленов ауданында басшылық қызметте болдым. Сол кездегі үлкен лауазым – аупарткомның бірінші хатшысы орынтағы маған сеніп тапсырылды. Сенім үдесінен шығуға ұмтылып, жастық күш-жігерімізді аямай жұмыс жасадық. Алайда қазіргі кездегідей аудандардың қарышты дамуы біздің өңіміз түгел түсімізге де кірмейтін. Өзіме жақсы таныс Тасқала және Зеленов аудандарына табиғат апаты кезінде Қазақстан Үкіметі тарапынан көрсетілген шексіз қолдау мен көмектен мен өз Отанымдай болып кеткен көршілес мемлекеттің орасан зор әлеуетін танып тұрғандаймын. Бұл үшін әрбір қазақстандықтың лайықты мақтаныш сезіміне бөлене алатыны анық. Әрине, көршілердегі жетістіктерді қызғанбаймыз. Оған қызығамыз. Шынын айтқанда, дәл қазір мен Зеленов пен Тасқаладағы тақтайдай түзу, сәні мен салтанаты келіскен көшелерді көріп ерекше толқу үстінде тұрмын. Жарайсыңдар, қазақстандықтар!
Мұнайшы және Садық Жақсығұлов атындағы қалашықтардың ашылу рәсімі кезінде оған қатысқан Төтенше жағдайлар министрі Владимир Божко Батыс Қазақстан облыстық ішкі істер департаментінің бастығы, полиция генералы Арман Жалмұхамбетовке «Төтенше жағдайлардың алдын алуда және жоюда үздік шыққаны үшін» медалін табыс етті. Сонымен бірге, министр Зеленов ауданы әкімінің орынбасары Алдияр Халелов пен Тасқала ауданы әкімінің орынбасары Қуат Мусинге «Құтқару операцияларына белсенді қатысқаны үшін» төсбелгісін тапсырды.
Темір ҚҰСАЙЫН.
Батыс Қазақстан облысы.