«Менің нәзік жанымды кім түсінер» деп кеткен Мұқағали Мақатаевтың болмысын терең таныған Фариза апамыз ақын өмірден өткенде «Жаралы жүрегімді жарға соғам, орныңды еш тұлғамен толтыра алмай» деп, артынан «Ол енді сұңқар жырдың қанатында, көк теңбіл Планетаны аралайды» деген екен. Шынында, Мұқағали қазір халықтық ақынға айналды. Әсіресе, өзі ғасырлар көшінде жастардың замандасы боламын дегені бұлжымай келіп, қазір толқын-толқын ұрпақтың сырласына айналды.
Өткен сенбі күні елордадағы Райымбек батыр атындағы №50 «Қазғарыш» мектеп-лицейінде ақынның туған күніне орай «Мен сені сағынғанда...» деген атпен әдемі кеш өтті. Кешті білім ордасының басшысы Роза Болатаева ашып, ақынның өмір жолына, өлең өрнектеріне тоқталды. Бұдан кейін оқушылар Мұқағалидың өлеңдерін оқып, жиналғандарды күй күмбіріне бөлеп, би ырғағымен тербеді. Ұстаздар қауымы «Қош, махаббат!» атты драмасындағы жастарға қажет тұрақтылық пен адалдықты баяндайтын сәттерді әдемі көріністермен алға тартты.
Жалпы, өркениетті елдерде, оның ішінде көршіміз Ресей халқы А.Пушкиннен бастап, Н.Рубцовқа дейінгі атақты ақындарының туған күнін жыр әлеміне айналдырып, бүкіл ел көлемінде атап өтіп жататыны белгілі. Сондай үрдіс біздің Отанымызда да қалыптасса, өлең дүниесіндегі алыптарымызды кейінгі ұрпақ танып, олардың рухани құндылығынан нәр алып, ұлттың жақсыларын ардақ тұтуды үйренер еді. Сонымен, өлең мен қара сөзді ұштастырған Мұқағали туындыларын әр қырынан келіп түлетуге мектеп директорының орынбасарлары Н.Ысқақова мен А.Иманбаеваның, сол секілді кітапхана меңгерушісі А.Жақсылықованың, қазақ тілі пәнінің мұғалімі Г.Алдабергенованың көп еңбек сіңіргенін атап айтуға болады.
Сүлеймен МӘМЕТ, «Егемен Қазақстан»