Парламент Мәжілісі депутаттарының Абай Тасболатов жетекшілік еткен ақпараттық-насихат тобы Қызылжар өңірінде жұртшылықпен кездесіп, тарихи маңызы зор құжат төңірегінде келелі пікір алмасты.
«Қазақстанның Үшінші жаңғыруы: жаһандық бәсекеге қабілеттілік» Жолдауының басты қағидаттарын түсіндіруге арналған келелі жүздесу М.Қозыбаев атындағы Солтүстік Қазақстан мемлекеттік университетінің профессорлық-оқытушылар құрамымен және студенттерімен өтті. Халық қалаулылары білім жүйесінің халықаралық стандарттарға сәйкестендірілуіне орай студент жастар алдына сыни тұрғыдан ойлау, өз бетімен іздену, қарым-қабілетін шыңдау, озық технологияларды игеру сияқты заманауи талаптар қойылып отырғанын айта келіп, жоғары оқу орындарының материалдық-техникалық базасын жетілдіру, білім беру бағдарламаларына бақылау мен талапты күшейту, құқықтық-қаржылық сауаттылықты арттыру, үш тілді еркін меңгеру мәселелері бойынша өз-ойларын ортаға салды.
«Мемлекет басшысы зор көңіл аударып отырған басымдықтардың қай-қайсысы болсын елдің тұрақтылығына, жаңа технологиялық-инновациялардың енгізілуіне қызмет етеді. Адами капитал сапасын жақсарту – өте көкейкесті мәселелердің бірі. Сол себепті білім беруді экономикалық өсудің жаңа моделінің орталық буынына айналдыру міндеті қойылып отыр», деді жастарға қарата айтқан сөзінде Абай Бөлекбайұлы.
Мәжіліс депутаттары Юрий Тимощенко, Шафхат Өтемісов Жолдауда қауіпсіздік ахуалы қуатты және әрекет ете алатын мемлекеттің өлшемі болып табылатынын, діни экстремизмді насихаттаудың алдын алу, әсіресе, діни қарым-қатынас саласындағы радикалды көзқарасқа байланысты кез келген әрекеттердің алдын алу, болдырмау қажеттігін атап көрсетті.
Облыстық мәслихатта ұйымдастырылған басқосуда еліміз үшін аса маңызды бағдарламалық құжаттың Қазақстанның жаһандық бәсекеге қабілеттілігін қамтамасыз етуге, республика тұрғындарының өмір сапасын төмендетпеуге, өркениетті отыз елдің қатарына қосылуға жан-жақты мүмкіндіктер ашатын бес басымдық жайлы кеңінен сараланды.
Өмір ЕСҚАЛИ, «Егемен Қазақстан»
Солтүстік Қазақстан облысы