Парламент Мәжілісінің депутаттары Жамбыл Ахметбеков, Бақытгүл Хаменова, Геннадий Шиповских, Марат Бопазов Атырау облысына жұмыс сапары барысында «Батыс» өңірлік қолбасшылығының штабында әскери қызметшілермен және олардың отбасы мүшелерімен кездесті.
Әскери қызметшілермен әңгімелесу барысында, депутаттар «Қазақстанның Үшінші жаңғыруы: жаһандық бәсекеге қабілеттілік» Жолдауын талқылап, ондағы әлеуметтік қамтамасыз ету бағытын түсіндірді. 2017 жылдың 1 шілдесінен бастап зейнетақы 20 пайызға көтерілетініне, 2018 жылдың 1 шілдесінен бастап зейнетақы тағайындаудың жаңа әдістемесі енгізілетініне тоқталды. «Нұрлы жер» мемлекеттік бағдарламасын жүзеге асыру жөніндегі маңызы жоғары мәселе туралы да айтып өтті.
Өз кезегінде сөз алған әскери қызметшілер Президент Жолдауын қолдайтындықтарын, елде жүргізілетін реформаларды талқылауға атсалысатындықтарын айтып, оң нәтиже күтетіндіктерін жеткізді.
Бақытгүл БАБАШ, «Егемен Қазақстан»
АТЫРАУ