Кездесуде Гүлшара Әбдіқалықова: «Соңғы жылдары Қазақстан мен Сербия арасындағы қарым-қатынастар саяси, экономикалық және мәдени-гуманитарлық салаларда серпінді дамып келе жатыр. Сербия Президентінің Қазақстанға сапары барысында нақты уағдаластықтарға қол жеткізілді. Қазақстан Президентінің Сербияға сапары кезінде де бірқатар маңызды келісімдерге қол қойылды. Біздің елімізге Сербияның Премьер-министрі де келіп, экономикалық қатынастарға оң ықпал ететін шешімдер жасалды. Алдағы уақытта сіздердің елдеріңіздің Парламент төрағасының да сапарын күтудеміз», – деді.
Мемлекеттік хатшы екіжақты үкіметаралық комиссияның өткен жылы табысты жұмыс істегеніне, екі ел арасындағы әріптестік байланыстың келешегі зор екеніне тоқталып өтті. Оның айтуынша, Қазақстан мен Сербия арасындағы қарым-қатынас қарқыны жыл санап артып келеді.
«Өткен жылдың статистикалық деректеріне сәйкес, өзара тауар айналымы шамамен 25 миллион долларды құрады. Одан бөлек, мәдени-гуманитарлық саладағы қатынастар да дамып келеді. Былтыр Сербия астанасында екі елдің Мемлекет басшыларының қатысуымен қазақтың ұлы ақыны Жамбыл Жабаевтың ескерткіші ашылды, сол үшін де ризашылығымызды білдіреміз»,– деді Мемлекеттік хатшы. Гүлшара Әбдіқалықова айтып өткендей, осы тектес игі шаралар Қазақстанда да атқарылуда.
Бүгінгі таңда Сербия мен Қазақстан арасында құрылыс, фармацевтика және ауыл шаруашылығы салаларындағы байланыс күшейіп келе жатқанын айта кету керек. Қазақстанның көтерме және бөлшек сауда, құрылыс салаларында Сербия капиталының қатысуымен оннан астам бірлескен кәсіпорын жұмыс істейтіні осының айғағы.
Елшімен кездесуде Мемлекеттік хатшы алдағы ЭКСПО-2017 халықаралық көрмесіне Сербия тарапы қатысуға ниет білдіргенін тілге тиек етті. Өз кезегінде Сербия елшісі ел Тәуелсіздігінің 25 жылдығымен және Қазақстанның БҰҰ Қауіпсіздік Кеңесінің тұрақты емес мүшесі болып сайлануымен құттықтады.
«Біз алдағы ЭКСПО көрмесіне қатысамыз. Қазір оған әзірлік жұмыстары қарқынды жүріп жатыр, идеялық және техникалық тұжырымдамасы жақын арада бекітіледі», – деді Владимир Миркович.
Кездесу соңында Гүлшара Әбдіқалықова сербиялық дипломатқа Қазақстан мен Сербия арасында сан салалы әрі сенімді серіктестік орнатуға үлес қосқаны үшін ризашылығын білдіріп, мықты денсаулық, игілік пен табыс тіледі.
Арнұр АСҚАР, «Егемен Қазақстан»