Бүгін Астанада ересектер арасында бокстан кезекті Қазақстан чемпионаты басталады. Мұндағы бірнеше күннен бері керіліп тұрған шаршы алаңда 23 қаңтарға дейін еліміздің жер-жерінен жиылған былғары қолғап шеберлері бақ сынасатын болады.
Қазір екі айдан бері ұлттық құраманың бас бапкері қызметін осы кезге дейін Оңтүстік Қазақстан облысы боксшыларының тізгінін ұстаған халықаралық дәрежедегі спорт шебері Мырзағали Айтжановтың атқарып келе жатқаны белгілі. Бокс федерациясының мәліметтеріне қарағанда, Астанада бір аптаға созылатын айқастарда Айтжанов күштілігімен, ептілігімен көзге түскен былғары қолғап шеберлерін Қазақстан ұлттық құрамасының сапына жинайтын болады. Бұл осы сында қара үзіп, чемпион атанған боксшылар енді ұлттық құрама сапына қосылып, биылғы жылы өтетін жазғы Азия ойындары мен келесі жылы Кореяның Бусан қаласында жалауын көтеретін әлем чемпионатына барады деген сөз.
Жалпы, Дамир Буданбековтің орнына келген маманның боксшыларды жиі кездестіріп, қолғап түйістіргізіп жатқанын тек жақсылыққа балау керек сияқты. Өйткені, мұндай айқастар бір жағынан шаршы алаңның шаңын қағып жүрген боксшылардың шеберлігін арттырса, екінші жағынан әлі ел чемпионаты секілді жауапты бәсекелерге бармаған жастар үшін нағыз тәжірибе алаңы болатыны сөзсіз. Бұған дейін ұлттық құраманың тізгінін ұстаған Мырзағали Айтжановтың көзге түскен боксшыларды іріктеп алып, Қазақстан командасын бірнеше бәсекелерге апарғаны белгілі. Сөйтіп, екі айда үш топқа іріктелген ұлттық құраманың боксшылары үш халықаралық турнирге қатысып қайтқан болатын. Оның біріншісі, Әзірбайжанның Баку қаласында өткен АІВА президентінің кубогы жолындағы турнир болса, екіншісі Ресейдің Ханты-Манси округінде мұнайлы елдердің арасында өткізілген әлем кубогы. Ал үшіншісі Қарағанды қаласында ұйымдастырылған Ғалым Жарылғаповты еске түсіруге арналған халықаралық турнир. Осылардың ішінде Бакуде бақ сынаған боксшыларымыз елімізге бір алтын, бір күміс және бір қола медальді алып келді. Осы жерде айта кететін нәрсе, Әзірбайжан астанасында өткен айқаста Айтжановтың төл шәкірті былтыр белгісіз себептермен әлем чемпионатына бара алмаған Біржан Жақып алтыннан алқа тағынып қайтты. Ал Ханты-Мансиде өткізілген бәсекеде ұлттық құрама үш қола жүлдеге ие болса, Қарағандыдағы сында отандастарымыз құрмет тұғырының ең биік сатысынан көріне білді. Онда 48, 54 кг. және аса ауыр салмақтағы боксшылардан басқаларының бәрі бас жүлдені олжалағанын атап өткен жөн. Мұнда кезінде кеншілер қаласының шаршы алаңында атой салып, жеңімпаз атанған Ермахан Ыбырайымов, Василий Жиров, Геннадий Головкин, Серік Елеуовтің жолын 51 кг. салмақтағы жас талант Жандос Ахметов, әлемнің екі дүркін чемпионы Серік Сәпиев пен басқа да боксшылар жалғастырды.
Міне, осындай бәсекелерге барып, жаңа тағайындалған бас бапкердің қарамағында жаттығып жүрген былғары қолғап шеберлері бүгін Астана төрінде бірнеше жылдан бері кезегін күтіп, керіліп тұрған шаршы алаңның шаңын қағу үшін өзара күш сынасатын болады. “Тойдың болғанынан, боладысы қызық” демекші, бұл бәсекені тағатсыздана күткен жанкүйерлер көп. Сондықтан болар, чемпионатты ұйымдастырушылар оның барынша қызықты әрі тартымды өтуіне қолда бар жағдайдың бәрін жасап отыр. Бокс федерациясының вице-президенті Жанболат Сәрсенов сияқты осы спорт түрінің айналасында жүрген мамандар биылғы чемпионаттың өткен жылдарға қарағанда, ерекше болатынына және жақсы нәтижелермен әрі өте қызықты өтетініне сенімді. Қалай болғанда да, шын мықтыны жекпе-жектің өзі көрсетеді. Қазір елімізде Серік Сәпиев, Біржан Жақып, Ғани Жайлауов, Олжас Сәттібаев, Бақытжан Қожабеков, Мерей Ақшалов, Бакуде өткен турнирде ресейлік боксшыдан он бір ұпай айырмасымен ұтылып тұрып, кездесудің аяқталуына санаулы секөнттер қалғанда қарсыласын ұрып жыққан Руслан Мырсатаев, олардың ізін басып келе жатқан Василий Левит, Жандос Ахметов, Ержан Өміржанов, Думан Әлімов, Азамат Белгібаев, Дәурен Елеусінов сынды жас таланттар баршылық.
Сөз соңында Астанада өтетін республика чемпионатының жартылай финалдық және ақтық айқастарын жанкүйерлер 22-23 қаңтар күндері “Қазақстан” ұлттық телеарнасынан тамашалай алатынын ескерткіміз келеді.
Дастан КЕНЖАЛИН.