Кеше «Нұр Отан» партиясы Төрағасының бірінші орынбасары Мұхтар Құл-Мұхаммедтің қатысуымен Қарулы Күштердің ұлттық әскери-патриоттық орталығында партияның Астана қалалық филиалының есептік-сайлау конференциясы өтті. Қала әкімі Әсет Исекешев жетекшілік еткен жиында осы кезге дейін атқарылған шаруалардың қорытындысы тыңдалып, болашақта жүзеге асырылуы тиіс басым бағыттар айқындалды.
«Елбасымыз бүгінде бүкіл әлем таныған әсем Астанамызды салып, оны дүние жүзіне жарқырата көрсетті. Астана бүкіл өңірлеріміз үшін дамудың даңғыл жолына айналды. Сондықтан «Нұр Отан» партиясының астаналық филиалы Елбасымыздың бағдарламалары мен стратегиялық курсын орындауда облыстық партия ұйымдары үшін үлгі-өнеге болуға тиіс», – деген Мұхтар Абрарұлы мұндай міндет, әсіресе, миллиондаған Экспо қонақтарын қарсы алу кезінде ерекше мәнге ие екендігін атап өтті.
Бүгінгі таңда «Нұр Отанның» астаналық филиалы 350 бастауыш партия ұйымының басын біріктірсе, соңғы екі жыл ішінде Астанадағы жетекші саяси партия мүшелерінің саны 12 195-тен 45 501 адамға дейін артыпты. Мұндай деректерді жиында арнайы қорытынды баяндама жасаған партияның қалалық филиалы төрағасының бірінші орынбасары Еділ Мамытбеков мәлімдеді.
Сондай-ақ, партияның мұрындық болуымен осы кезге дейін 5 мыңнан астам түрлі форматтағы іс-шара ұйымдастырылып, оған 400 мыңнан аса адамның қатысуы қамтамасыз етілген. Соның ішінде «100 нақты қадам» Ұлт жоспары аясында қабылданған заңды түсіндіру жұмыстары бойынша 463 кездесу өткізіліпті. Сонымен қатар, «Нұр Отан» партиясының қалалық филиалы «Нұрлы жол» инфрақұрылымды дамыту бағдарламасын жүзеге асыруды тұрақты бақылау жұмыстарын да шебер үйлестіріп келеді. Осы мақсатта мәслихаттағы партия фракциясы жанынан арнайы төрт инспекциялық комиссия құрылып, олар Астанадағы құрылыс нысандарын аралап, 22 рейд жүргізген. Ал партияның қалалық қабылдау бөлмесіне соңғы екі жылдың ішінде 26 мыңнан астам азамат көмек сұрап келген болса, олардың 38 пайызының мәселесі сол жерде оң шешімін тапқан. Қалғандары тиісті мемлекеттік органдарға жолданып, партиялық бақылауға алынған.
Есептік-сайлау конференциясында қызу талқыланған тағы бір тақырыптың бірі – таяуда Қазақстан Парламенті қабылдаған Тәуелсіздіктің 25 жылдығы Декларациясы болды. Оған ерекше көңіл бөлу қажеттігіне тоқталған Партия Төрағасының бірінші орынбасары, Елбасымыз ширек ғасырда Қазақстанды қуатты, біртұтас, қарқынды дамыған мемлекетке айналдырғанын тілге тиек етті.
«Қазіргі таңда Елбасымыз алдымызға Бес институттық реформа, «100 нақты қадам» Ұлт жоспары, «Нұрлы жол», индустриялық-инновациялық даму бағдарламасы, әлемнің ең дамыған 30 мемлекетінің қатарына қосылу сияқты жаңа ауқымды міндеттер мен мақсаттар қойып отыр. Біздің партиямыздың басты міндеті – Мемлекет басшысы тапсырмаларының орындалу сапасына қатаң әрі тұрақты бақылау орнату болып табылады», – деді Мұхтар Құл-Мұхаммед.
Нұрлыбек ДОСЫБАЙ,
«Егемен Қазақстан»