Ескі көліктерді қабылдауға арналған бағдарлама аясында қазақстандықтар бір аптаның ішінде 188 машина тапсырып, әрбір темір тұлпары үшін 150 мың теңге алды, деп xабарлайды ҚазАқпарат.
Бағдарламаның үйлестірушісі – «ӨКМ Операторы» ЖШС мәліметіне сәйкес, утилизацияға түскен көліктердің басым бөлігі 25-30 жыл бұрын шығарылған. Олардың ішінде «ВАЗ»-дар, «ГАЗ-3110», «Москвич-2140», ал шетелдік көліктерден «Mazda 626» жиі кездеседі. "Ең ескі көлік - шыққанына 70 жылдан асқан «Москвич», ал жаңалардың арасында 2007 жылғы «ВАЗ-2104» көлігі бар.
«Бүгінде Қостанай қаласы ескі көліктерді тапсыру жағынан оқ бойы озық тұр. Бір аптаның ішінде 38 машина тапсырылды. Ал Ақтау мен Атырауда бір-бір көліктен ғана утилизацияға берген», – дейді бағдарлама үйлестірушілері.
Айта кетейік, өткен аптада утилизациялау бағдарламасы аясында ескі көліктерді қабылдау жұмыстары басталып, республиканың 17 қаласында қабылдау ашылған болатын.