Парламент Сенатының депутаты Ақан Бижанов Абай атындағы Қазақ ұлттық педагогикалық университетінің профессорлық-оқытушылар құрамы және студенттерімен кездесіп, «Егемен Қазақстан және Елбасы» тақырыбы бойынша лекция оқыды.
Сенатор биыл біздің еліміз Тұңғыш Президент күнін Қазақстан тәуелсіздігінің 25 жылдығы қарсаңында атап өткелі отырғанына тоқталды. Сенатор біздің мемлекетіміздің жаңа тарихында болып жатқан саяси және әлеуметтік-экономикалық түбегейлі өзгерістер Мемлекет басшысы Н.Ә.Назарбаевтың есімімен тығыз байланысты екенін атап көрсетті.
Депутат өз сөзінде еліміздің Тұңғыш Президенті – Елбасының мемлекетті құрудағы және дамытудағы, әлемнің алдыңғы қатарда дамыған 30 елінің қатарына енудегі жаңа жетістіктерге Қазақстан халқын жұмылдырудағы рөліне ерекше екпін түсірді.
Сөзінің соңында А. Бижанов кездесуге қатысушыларды алдағы мерекелермен құттықтады және университеттің профессорлық-оқытушылар құрамына еліміздің қажетіне орай жоғары білікті мамандар даярлау жұмыстарына тілектестігін білдірді, деп хабарлады Парламент Сенатының баспасөз қызметі.