Ел Тәуелсіздігінің 25 жылдығына арнап Антарктидаға екінші қазақстандық экспедиция жіберілді. «Тәуелсіздік Полюсі» деп аталатын ғылыми-зерттеу экспедициясының мүшелері Оңтүстік полюстегі Винсон шыңын бағындырмақ. Бұл туралы Орталық коммуникациялар қызметінде өткен баспасөз мәслихатында ҚазГео төралқа төрағасы Төлеген Тастанбеков мәлім етті.
Қазақстан халқы Ассамблеясының қамқорлығымен өткізілетін ғылыми-зерттеу экспедициясын «Қазақ географиялық қоғамы» қоғамдық бірлестігі ұйымдастырып отыр. Жобаның бас серіктесі – «Бәйтерек» ұлттық басқару холдингі.
«Экспедиция 1 желтоқсанда Қазақстан Республикасының Тұңғыш Президенті күні басталды. 16 желтоқсан – еліміздің Тәуелсіздік мерекесін тойлаған күні Антарктиданың ең жоғары нүктесі – Винсон шыңына (4892 м) Қазақстан Республикасының Мемлекеттік Туы тігіледі», деді Т.Тастанбеков.
Бұдан бөлек, экспедиция қатысушылары 200 шақырымнан астам қашықтықты шаңғымен жүріп өтпек. Баспасөз мәслихатында «Тәуелсіздік Полюсі» экспедициясының негізгі құрамы жарияланды. Оның қатарында Алматы қаласындағы «QazaqGeography» аймақтық өкілдігінің жетекшісі Мағжан Сағымбаев, альпинистер Ильяс Ғалымбеков пен Юрий Юшин, ғалымдар Әлия Ерназарова, Арман Баймұхамедов пен Дәулет Шәріпов бар. Сондай-ақ, экспедицияға әл-Фараби атындағы Қазақ ұлттық университеті мен С.Асфендияров атындағы Қазақ ұлттық медициналық университетінің ғылыми қызметкерлері аттанды. Олар экология, биология мен адам физиологиясы салаларында зерттеу жұмыстарын жүргізеді. Соның ішінде Антарктиданың экожүйесінде болатын органикалық пестицидтерді, төтенше жағдайға бейімделген микроағзалардың алуан түрлілігін анықтауды және Антарктиданың төтенше ортасында ауа райының адам денсаулығы мен психологиялық сезіміне әсер беретін ықпалдарды табуды көздеп отыр.
Айдар ӨРІСБАЕВ,
«Егемен Қазақстан»