«Отырар сазы» оркестрі ұлттық аспаптарымыздың аса бай түрлерімен танысуға мүмкіндік беретін бірден-бір оркестр. Оркестрде домбыра мен қобыздан басқа баға жетпес мәдени мұра болып есептелетін жетіген, шертер, шаңқобыз, месқобыз, сырнай мен сазсырнай, сыбызғы мен асатаяқ, дауылпаз, тұяқтас қоңырау, қайрақ үн қатады. «Отырар сазының» негізін қалаушы – Халық қаһарманы, КСРО халық әртісі, Мемлекеттік сыйлықтың лауреаты, композитор Нұрғиса Тілендиев еді. Музыка өнерінде қайталанбас із қалдырған тұлға оркестрді бірегей шығармашылық ұжымға айналдыра білді. Бүгінде ұжымға Н.Тілендиевтің қызы, Қазақстанның еңбек сіңірген қайраткері Дінзухра Тілендиева жетекшілік етеді. Ал оркестрдің дирижерлері – Қазақстанның еңбек сіңірген әртісі Жалғасбек Бегіндіков пен Мүсілім Әмзе. Оркестр тек өз елімізде ғана емес, әлемнің көптеген елдерінде концерт өткізіп жүрген таңдаулы ұжымдардың қатарында. Астанада өткен концертке де «Отырар сазының» мол дайындықпен келгені көрінді. Қазақстанның еңбек сіңірген қайраткерлері Жәмила Серкебаева, Жәмила Баспақова, Гүлзия Стамбек, Лариса Насретдиновалар, сондай-ақ, Халықаралық байқаулардың лауреаттары Бақтыгүл Бисембаева, Фархад Кубиев, Нұрсұлтан Шатырханұлы концертте қазақ және шет ел композиторларының шығармаларын орындады.
Айгүл СЕЙІЛОВА, «Егемен Қазақстан»