Әдеби кеш шымылдығын Өзбекстан Жазушылар одағы басқармасының төрағасы, аса көрнекті прозашы Мұхамед Али кіріспе сөзбен ашып, кеш иесінің өзбек әдебиетін дамытуға қосқан елеулі үлесі мен қазақ әдебиетін насихаттау бағытында тынымсыз, жемісті жұмыс істеп жүрген еңбегін жоғары бағалады. Өзбекстанның халық жазушысы, Мемлекеттік сыйлықтың екі мәрте лауреаты, Қазақстан Республикасы Президентінің руханият сыйлығының лауреаты, 88 жастағы абыз Насыр Фазылов, филология ғылымдарының докторы, профессор Қазақбай Йулдошев, осы шараға Қазақстаннан ат арытып арнайы келген жазушы Сәбит Досанов, ақын Мирпулат Мирза және басқалар Мехмон Исламқұловтың прозалық, драмалық шығармалары, көл-көсір көрнекті аудармалары әдеби қазынаны байыта түскен аса бағалы еңбек екендігін қадап айтты. Қазақ ақыны Қасымхан Бегманов пен өзбек ақыны Лола Жунис арнау өлеңдерін оқыды. Әдеби кештің екінші бөлімінде жазушының жары Дилфуза ағынан жарыла ақтарыла айтқан ақжарма ақ тілек пен Өзбекстанның өнер жұлдыздары шырқаған әсем әндер әдеби кешке әр қиырдан жиналған халықтың көңілін көкке көтерді. Өзбекстан мен Қазақстанның мәдениеті мен әдебиетіне аянбай адал қызмет етіп жүрген көрнекті жазушының құрметіне ұйымдастырылған жиын достықтың туын биік көтерген көркем кеш болды.
«Егемен-ақпарат»