Тәуелсіз Қазақстан тарихында тұңғыш рет халықаралық дәрежеде ұйымдастырылған жиынның жабылу салтанатында сөз алған министрдің орынбасары шараның маңыздылығына тоқталды. Қарулы күштеріміздің Жоғарғы Бас қолбасшысы Нұрсұлтан Назарбаев өзінің Жолдауында, «жастар – біздің үмітіміз және болашағымыз» деп ұландарымызға зор сенім артады. Сол сенімді ақтауға бүгінгі жеңіс тұғырынан табылған әр сарбаз лайық. Олар бір аптаның ішінде шынайы әскери болды. Бүгінгі сапта болашақ Сағадаттарымыз, болашақ Талғаттарымыз тұрғандығына мен кәміл сенемін. Жиынға өздеріңіз көргендей, Ресей Федерациясы Орынбор президенттік кадет училищесінің тәрбиеленушілері қатысты. Қорғаныс министрлігінің басшылығы Ресей Федерациясының Қорғаныс министрлігіне жастарды тәрбиелеудегі бірлесіп атқарып жатқан жұмыстары үшін алғыс білдіреді, – деді Мұрат Майкеев. Сонымен қатар, жиынға қатысушыларды Дін істері және азаматтық қоғам вице-министрі Абзал Нүкенов құттықтады. – Бұл жиынның тарихи мазмұны Елбасы Нұрсұлтан Назарбаевтың өскелең ұрпақты әскери-патриоттық рухта тәрбиелеу жөніндегі талаптары мен тапсырмаларына түбегейлі жауап бере алады. Болашақ сарбаздардың, қастерлі Тәуелсіздігіміздің шыңдалған, шыныққан қалқаны бар екендігіне көз жеткіздік. Тәуелсіздік оңай келген жоқ. Оны алу бар да сақтап қалудың жөні тіпті бөлек. Осы жауапкершілікті толық түсінгендіктеріміздің дәлелі – бүгінгі жиын, – деді. Шынымен де «Спасск» полигоны үш күн бойы асқақ рухтың алаңына, айнымас достықтың тұрақты тұғырына кепіл болды. Сайыпқырандар сайысып, жас сарбаздар жеңістің дәмін татты. Жеңілгендері жігерлерін намысқа қайрады. Сонымен, байрақты бәсекенің «Эрудит» сайысы бойынша Астана қаласындағы Кеңес Одағының Батыры С.Нұрмағанбетов атындағы республикалық «Жас Ұлан» мектебінің аға сержанты Сырым Әділбайұлы ең зияткер қатысушы атағын жеңіп алды. Аталмыш жиынға қатысқан республикалық «Жас Ұлан» мектептерінің арасындағы жалпы командалық есебі бойынша 1-орынды Алматы қаласындағы Б.Момышұлы атындағы «Жас Ұлан» РӘМИ, 2-орынды Қарағанды қаласының Т.Бигелдинов атындағы республикалық «Жас Ұлан» мектебі, ал 3-орынды Астана қаласындағы С.Нұрмағанбетов атындағы республикалық «Жас Ұлан» РӘМИ иеленді. Әскери-патриоттық клубтар бойынша жалпы командалық есепте 3-орынды Астана қаласынан келген «Бүркіт» командасы, 2-орынды Семей қаласындағы «Жас қыран» әскери-патриоттық клубы, ал 1-орынды «Жетісу тарландары» иеленді. – Былтыр мен АК-74 қаруын бөлшектеу және жинау бойынша жарыста бір секундқа ғана ұтылған болатынмын. Ал биыл рекорд жаңартып, сол сайыстан бірінші орынды иелендім. Жиын – жаңа тәжірибелер мен жаңа достар табуға таптырмас орта, – дейді «Бүркіт» клубының тәрбиеленушісі Индира Аитова.
Мирас АСАН, «Егемен Қазақстан»
Қарағанды облысы