Аталмыш көрмеге өздерінің бай мұраларын әкелген ұжымның бірі – «Таңбалы» қорық-мұражайы. Бұл мекеме Алматы облысы, Жамбыл ауданы, Қарабастау ауылынның маңында орналасқан. Елді мекеннің дәл іргесінде 3800 гектар алқапты алып жатқан «Таңбалы» шатқалы бар. Мұнда қола дәуірінен бастап, біздің заманымызға дейінгі аралықты қамтитын 5000-нан астам петроглиф орналасқан. Бұл мұралар Орталық Азияның жартас өнеріндегі бірегей құндылық болып саналады әрі 2004 жылдан бастап ЮНЕСКО-ның бүкіл әлемдік мұралар тізіміне енген. Музей қызметкерлері «Таңбалы петроглифтер» атты жылжымалы көрмеге тас бетіне бәдіздеп оймыштаған таңбалардың әртүрінен экспонаттар әзірлепті. Атап айтқанда, көрме залына – тауешкі, бұғы сияқты дала жануарларының бейнесі мен тотемдік табыну әрекетіне тән шеңберлі күнжүйесі сияқты тастағы бейнелермен қатар, қыш ыдыстар, ескі қорымдарға жүргізілген қазба жұмыстары кезінде түсірілген артефактілер мен фотодеректер, т.б. топтастырылған. Келесі залдағы көрмеге «Сақ мәдениеті» деген атау беріліпті. «Өйткені, мұндағы жәдігерлер алдыңғы таңбалы тас мәдениетін көне сақ мәдениетімен жалғастырушы экспозиция ретінде бірін-бірі толықтырып тұр», дейді «Есік» мемлекеттік тарихи-мәдени қорық-музейінің ғылыми қызметкері Әсел Әмірбекова ханым.
Мұнда да Алматы облысы аумағынан жаңадан табылған, әлі ғылыми айналымға енбеген жартас бетіндегі суреттер қойылыпты. Барлығы 35 бейне-нысан 5 топқа бөлініп орналастырылған. Бұл тасбейнелер «Жетісу өлкесіне тән сақ мәдениетінің идеологиясы мен мифологиясы» атты ғылыми қолданбалы жоба аясында жинақталып, зерттелу үстінде көрінеді.
Үшінші көрме «Ұлытау әлемі» деген атпен ашылыпты. Мұндағы басты идеялық мақсат – Ұлытау табиғи-мәдени ландшафтысының ерекшелігін таныстыру екен. Көрме залында – Ұлытау өңірінің тыныс-тіршілігімен таныстыратын фотоколлаждар, Талдысай қонысының фотопрезентациясы, «Әлемдік тау» архетипі іспетпес сақ обалары мен тас мүсіндер фотодерегі қатарлы дүниелер қойылған. Бұл тарихи-ақпараттық құжаттар «Ұлытау» қорық-мұражайының экспозициясы қорынан жеткізілген.
Бекен Қайратұлы, «Егемен Қазақстан»
Суреттерді түсірген Орынбай Балмұрат, «Егемен Қазақстан»