Генаның теңдессіз шеберлігіне таңғалғандарға оның өмір жолы үлгі іспетті. Таяуда кәсіпқой бокс туралы ақпарат тарататын танымал boxingnewsonline.com сайты Головкиннің қазіргі жетістігіне жеткенге дейінгі 5 маңызды сәтін атап көрсетіпті.
«Қыркүйектің 16-сы күні Т-Мобайль аренасында орта салмақтың чемпионы Головкин Сауль Альварес Канеломен жұдырық түйістіріп, биылғы ең маңызды және көп күтілген жекпе-жегін өткізеді. Мексикалықпен болатын айқас алдында қазақ боксшысының есте қаларлық 5 сәтін ұсынып отырмыз» – деп жазады boxingnewsonline.com сайты.
Генаның карьерасындағы ең әуелгі маңызды сәт – әуесқой рингтегі теңдессіз нәтижесі деп есептейді мақала авторы. «Кәсіпқой рингте көтерілгенге дейін ол Қазақстанда аты шығып, әуесқой бокста 345 мәрте жеңіске жетіп, 5 кездесуде ғана ұтылып, теңдессіз нәтижеге қол жеткізді. 2003 жылы Тайландта өткен әлем чемпионатында алтын медаль жеңіп алғаннан кейін Головкиннің атағы одан әрі асқақтады» – деп жазады boxingnewsonline.com. Мақала авторының пікірінше, Афины Олимпиадасы (2004 жыл) Генаның спорттық өміріндегі ең маңызды сәт. Сондай-ақ, байрақты бәсекенің күмісі кәсіпқой бокстағы таңғаларлық тағдырының іргетасы болды дейді автор.
Геннадийдің кәсіпқой рингтегі кезеңі келесі бір маңызды сәт Абель Санчеспен келісімге келуі екеніне тоқталады. «Кәсіпқой рингке ауысқан соң Головкин ағайынды Кличколар секілді Мэдисон Сквер Гарденде жекпе-жек өткізуді мақсат етті. Арманына жету үшін ол К2 промоутерлік компаниясымен келісімшарт жасасып, ардагер бапкер Абель Санчестің қарамағына келді» – деп мәлімдейді boxingnewsonline.com. Мақалада бапкердің жас қазақ боксшысына бірден көңілі толғаны айтылған. «Санчес мексикалықтардың жойқындығын Головкиннің байқампаз әуесқой шығыс стилімен байланыстырды. Нәтижесінде, соққысы дөп тиетін, жаужүрек боксшы қалыптасты.
Мақалаға ден қояр болсақ, 2010 жылы 14 тамызда тұңғыш рет кәсіпқой бокстан чемпионы» атануы – Головкиннің өміріндегі үшінші маңызды сәт. Сол кезде Гена колумбиялық Милтон Нуньеспен WBA Interim тұжырымдамасына таласқан болатын. «Головкиннің қарсыласы жекпе-жек бастала сала қожырап, көзді ашып-жұмғанша 58 секунд ішінде Головкин Нуньесті нокаутқа жіберді. Қазақ WBA Interim белдігін алған, алайда бір жылдан кейін WBA-ның тұрақты чемпионы атанды».
Boxingnewsonline.com Головкиннің келесі бір маңызды қадамы деп Келл Брукпен өткізген жекпе-жегін есептейді. Аталған кездесу Генаның Ұлыбританиядағы танымалдығын арттыруға себеп болды. Естеріңізде болса, бұл жекпе-жек былтыр 10 қыркүйекте Лондонда өткен еді. Жекпе-жектің 5-раундында Головкиннің нөсердей жауған соққыларына Бруктың шыдамағанын көрген бапкерлері шәкіртінің жеңілгенін мойындап, шаршы алаңдағы айқасты мерзімінен бұрын тоқтатқан болатын. Мақала авторының сөзіне сүйенсек, Генаның карьерасындағы бесінші маңызды сәт ретінде Даниэль Джейкобспен өткен жекпе-жек есептеледі. Орта салмақтағы әлемнің екі мықты боксшысы өткізген кездесуде америкалық былғары қолғап шебері Головкинге әжептеуір қарсылық көрсетті деп тәпсірлейді boxingnewsonline.com. Әйтсе де, Майқұдықтың майталманы қарсыласына дес берген жоқ.
Геннадий Головкин келесі жекпе-жегін 18 қыркүйекте Лас-Вегаста Сауль Альвареске қарсы өткізеді. Алдағы кездесуде Генаның 4 белдігі, WBA тұжырымдамасының супер чемпионы, WBC тұжырымдамасының чемпионы, IBF тұжырымдамасының чемпионы, IBO жеңімпазы атақтары мен The Ring журналының белдігі сарапқа салынады. Бұл – Головкиннің кәсіпқой рингтегі 38-ші жекпе-жегі. Гена әлі бірде-бір рет жеңіліп көрген жоқ. Қыркүйектегі кездесуде де Майқұдықтың майталманы жеңісті жолын жалғастырады деп сенеміз.
Ағылшын тілінен әзірлеген Абай АСАНКЕЛДІҰЛЫ, «Егемен Қазақстан»