Маңғыстау облысында ауыз су мәселесі өзекті. Сондықтан, бұл мәселені шешудің бірден бір жолы – су тұщыту зауытын салу. Сол себепті, бүгін өңірге ресми сапармен «BeltWay Group Limited» компаниясының директоры Әли Мохамад пен «Астана Қызмет-КЗ» ЖШС директоры Болат Ыдырысбаев, «SafBon Water Service (Holding) Inc.» мекемесінің бас менеджері Ванг Ксиан келді. Олар Маңғыстау облысында су сұщыту зауытын салуды көздейді. Сондықтан, арнайы жоба дайындап, облыс әкімі Ералы Тоғжановқа және жиынға қатысушыларға таныстырды, деп хабарлады Маңғыстау облысы әкімінің баспасөз қызметі.
«BeltWay Group Limited» компаниясы 1995 жылы Шанхайда құрылып, бүгінде әлемдік деңгейде, түрлі сала бойынша қызмет көрсетіп жүрген «BeltWay Group Limited» компаниясының директоры Әли Мохамад жобаны іске асырып, ең озық технологияны пайдалануға дайын екенін жеткізді. Жоспар бойынша зауыт Құрық ауылынан 22 шақырым жерде орналасады. Қорек көзі ретінде газ-турбиналық электр станциясы пайдаланылады. Қуаттылығы күніне 80 мың куб метр және болашақта оның қуаттылығы арта түспек. Тұщытылған сумен «ӨзенМұнайГаз» АҚ, Жетібай, Құрық ауылдары мен Ақтау, Жаңаөзен қалаларын қамтамасыз етілмек. Сонымен қатар, бұл жоба өңірде ауылшаруашылығы саласын дамытуға тың серпін бермек.
Жиын соңында облыстық әкімдік пен компания арасында ұзақ мерзімді және өзара тиімді ынтымақтастық туралы меморандумға қол қойылды.
Өңір басшысы Ералы Тоғжанов жобаны дайындау және жүзеге асыру мәселелерімен айналысатын жұмыс тобын құруды тапсырды, делінген баспасөз хабарламасында.
Гүлайым ШЫНТЕМІРҚЫЗЫ,
Маңғыстау облысы.
Суретті түсірген Серік МАЙЕМЕРОВ.