Бұл қанатқақты жоба аясында 100 оқушы Риддер аграрлық-техникалық колледжінде еңбек нарығында сұранысқа ие мамандықтарды меңгеріп шығатын болады. Облыс әкімінің орынбасары Ә.Нүсіпова аймақ басшысы Д.Ахметовтің қолдауымен 2017 оқу жылында осы мақсатқа бюджеттен 200 миллион теңгеден астам қаражат бөлінгенін айтады.
Оқу бітірген жастарды жұмыспен қамтуға ықылас танытып отырған «Қазцинк» ЖШС әкімшілік мәселелер жөніндегі атқарушы директоры А.Лазаревтің сөзіне сенсек, кәсіпорынға ең алдымен кен-байыту және металлургия саласының мамандары қажет.
«Риддер қаласында еліміздің ешбір жерінде жоқ ерекше оқу орталығы бар. Онда арнайы жабдықталған кабинада отырған оқушы өз бетімен жүретін машинаны басқарып, дағдыланады. Құрал-жабдық шахтадағы іс-қимылдарды толық қайталайды. Барлық іс-әрекеттер экраннан 3D кескінінде көрінгендіктен, студент өзін шахтада жүргендей сезінеді. Соның нәтижесінде оларға кейін өндірісте жұмыс істеуге жеңіл болады», дейді ол.
Облыстық білім басқармасының басшысы Н.Әбжапаровтың айтуынша, 2017-2018 оқу жылдарында өңірде колледждерде білім алуға алты мыңнан астам мемлекеттік грант бөлініпті. Барлық гранттардың төрт жарым мыңы жергілікті бюджеттен, 1,7 орын республикалық бюджеттен қаржыландырылады екен. «Үстіміздегі оқу жылында 210 бала «Серпін» бағдарламасымен мамандық меңгеріп шығатын болады. Аталмыш бағдарлама бойынша барлығы 400-ден астам жас білім алып жатыр. Бітіріп шыққан 20 түлек қазір «Қазцинк» кәсіпорнының Риддердегі өндіріс орындарында жұмыс істейді», дейді басқарма басшысы.
Меморандум аясында білім алып шыққан жастар тек «Қазцинк» компаниясында ғана емес, сонымен қатар «Қазминералс» сияқты кәсіпорындарда да жұмыс істей алады. Алдағы уақытта бұл жобаны Өскемен қаласында да жүзеге асыру жоспарланған.
Азамат ҚАСЫМ,
«Егемен Қазақстан»
ӨСКЕМЕН