Мемлекет басшысының атына Оңтүстік Қазақстан облысы, Төле би ауданының құрметті азаматы, білім беру саласының ардагері Светлана Сергеевна Хоменкодан хат келді, деп хабарлады Қазақстан Республикасы Президентінің баспасөз қызметі.
Автор өз хатында Елбасы Н.Ә.Назарбаевты алда келе жатқан ел Тәуелсіздігінің 20 жылдығымен құттықтай отырып, жаңа Қазақстанның қарыштап дамуы және әлемдік аренадағы беделінің күн санап өсіп отырғаны, ең алдымен, Президенттің есімімен тікелей байланысты әрі ерен еңбегінің нәтижесі екенін зор мақтаныш сезіммен жазады.
Одан әрі хатта былай делінген: «Қазақстан бүгінде Сіз және келешек ұрпақтар мақтан ететін өз тарихының жаңа беттерін жазуда. Бүгінгі біздің республикамыз – күллі әлемге танылған, ашық және гүлденген ел. 90-жылдардағы Қазақстан мен бүгінгі Қазақстанның арасында қаншама орасан айырмашылықтар бар десеңізші! Ол кезде қалай өмір сүреміз деп алаңдадық, ал қазір жақсы өмір сүріп келеміз. Ол уақытта күйреген экономиканың қай бағытқа бұрылатынын білмей сарсаңға түстік, ал қазір еліміз көз алдымызда өркендеп келеді. 90-жылдары Сіздің «Қазақстан-2030» Стратегияңызбен ең алғаш танысқаным есімде. Шынын айтсам, ол уақытта жолымызда талай қиындықтар тұрғандықтан, күрделі кезеңдер болғандықтан, Стратегияның іске асатынына сену оңай емес-ті. Алайда, Сіз болашақ ұрпақтар үшін үлкен жетістіктерге жететін мемлекетті жаңадан құратыныңызға сенген, алдағыны 100-200 жыл бұрын көре білетін қайраткер адамдар қатарынан екеніңізді енді біліп отырмыз. Осыншама қысқа мерзімде біздің еліміз таңданарлық жетістіктерге қол жеткізгеніне сүйсінеміз. Қазақстандықтардың кірісі артуда, еңбекақы мен зейнетақы көлемі өсуде. Біз, білім беру саласының ардагерлері Қазақстанда заманауи мектептер пайдалануға беріліп, ол білім ордаларына оқушылар мен мұғалімдердің зор қуанышпен кіріп жатқандарын көріп, шаттанудамыз. 1997 жылы Сіз орта білім беру жүйесін ақпараттандыру мемлекеттік бағдарламасы туралы айттыңыз. Қазір бұл сөз шындыққа айналды. Біздің республиканың барлық мектептері, әсіресе, ауылдық және қала мектептері компьютермен жабдықталған, интернет жүйесіне қосылған. Бұл – зор жетістік. Өзіңіз үнемі айтатындай, XXI ғасыр – жаңа технологиялар мен коммуникация ғасыры. Жастарымызға жаңа технологияны меңгеру үшін мемлекет тарапынан барлық қамқорлықтар жасалуда. Мен педагог, Қазақстан азаматшасы, ана және әже ретінде Сізбен толық келісемін, лайықты білім алу – Қазақстанның бәсекеге қабілеттілігін қамтамасыз етуге мүмкіндік беретін маңызды құрал».
Хат иесі одан әрі елімізде тыныштықтың, бейбітшілік пен келісімнің, әртүрлі ұлт өкілдері арасында өзара түсіністік пен ынтымақтастықтың орнауы Қазақстандағы ұлттық саясаттың жемісі екенін айта келіп, Елбасының ел мүддесі жолындағы қызметіне толайым табыс, бақыт және зор денсаулық тілейді.