19 қазанда Президенттің «Ақорда» резиденциясында Қазақстан Республикасы Президенті Әкімшілігі Басшысының орынбасары Б.Байбектің төрағалығымен мемлекеттік басқару тиімділігін арттыру мәселелері жөнінде республикалық семинар өтті.
Семинар шеңберінде мемлекеттік басқару, бақылау қызметі тиімділігін жетілдіру және өңірлер рейтингін өткізу мәселелері талқыланды. Сондай-ақ, Елбасы Жарлығына сәйкес жүргізілетін мемлекеттік органдар қызметінің тиімділігін жыл сайынғы бағалау жүйесіне айрықша көңіл бөлінді.
Семинардың жұмысына Президент Әкімшілігінің және Премьер-Министр Кеңсесінің жауапты қызметкерлері, Ресей Федерациясы Президентінің Бақылау басқармасының делегациясы, сондай-ақ орталық атқарушы органдардың жауапты хатшылары мен Астана, Алматы қалаларының, облыстар әкімдерінің аппарат басшылары қатысты.
Ресей Федерациясы Президентінің көмекшісі – Бақылау басқармасының бастығы К.Чуйченко Ресей Федерациясы Президентінің тапсырмалары мен басқа да шешімдерін іске асыру үшін бақылауды қамтамасыз ету мәселесі бойынша өз тәжірибесімен бөлісті.
Байланыс және ақпарат министрі А.Жұмағалиев «Электрондық үкімет туралы», Мемлекеттік қызмет істері агенттігінің төрағасы Ә.Байменов «Мемлекеттік қызметтің қазақстандық үлгісі туралы» баяндамалар жасады.
Пікір алмасу қорытындылары бойынша мемлекеттік органдар қызметінің тиімділігін одан әрі арттыру жөнінде нақты тапсырмалар берілді.
«Егемен-ақпарат».