Жуырда Петропавл қаласына ережесіз жекпе-жек түрлері бойынша республикалық федерацияның президенті Анатолий Ким мен бірқатар жаттықтырушылар келді. Ажал аузынан аман қалса да, өмірлік ғаріп болып қалған Ербол Хамитовтың жағдайын естігеннен кейін, олардың моральдық қолдаумен қатар материалдық жағынан да көмек қолдарын созуы айналамыз жүрек жылуын жоғалтпаған жандарға толы екенін байқатса керек.
Адамгершілік қасиеттерді ардақтайтын ізгі қадам биыл колледж бітіріп, одан әрі Отан алдындағы азаматтық борышын өтеуді, жоғары білім алуды, жаттықтырушы болуды мақсат еткен 19 жастағы бозбаланы қанаттандырып, өмірге деген құштарлығын арттырған еді.
Ербол жастайынан спортпен айналысып, шымырланып, шынығып өсті. Осыдан үш жыл бұрын жекпе-жек және джиу-джитсумен жүйелі түрде шұғылдана бастаған. Күрестің әдіс-тәсілдерін жетік меңгерудің арқасында қалалық, облыстық жарыстарға қатысып, бірнеше рет топ жарды. Республикалық турнирлерде жүлдегер атанды. Оның еңбекқорлығын, жанкештілігін федерация басшылығы жоғары бағалап, құрамаға қабылдаған болатын. Өмірдің бұралаң жолдарында қиын жағдайға ұшыраған кезде қамқорлығына алды.
Осы жылдың 29 шілдесі оның тағдырын мүлдем басқа арнаға бұрып жіберді. Жастық кезеңнің нағыз шешек атқан кезінде тағдырдың тәлкегіне кезігемін деп еш ойламаған шығар. Қаладағы «Парк-Сити» түнгі клубында екі жігітпен болған жанжал барысында бұған суық қару кезеніп, күш көрсетілді. Намысты жас одан ыға қоймаған. Осы ойын-сауық орталығы жанында «Барыс» баскетбол командасының ойыншысы Игорь Нанаевты бір топ әумесер жабыла ұрып, оның соңы өлімге соқтырғанын айта кеткен жөн. Ертеңіне қос тарап кездесу орнын белгілеген. Спортшы жігітке күштері жетпесін білген әлгі екеу шолақ мылтықтан бірнеше рет оқ атқан. Нәтижесінде, Ербол ауыр жараланып, ауруханаға жеткізілген. Оның сол аяғын тізеден жоғары жерден кесуге тура келді. Осы қылмыстық іске қатысты деген күдікпен үш адам тұтқындалып, тергеу амалдары жүргізілуде. Олар үш қылмыстық оқиға бойынша айыпталып, 15 жылдан 20 жылға дейін бас бостандығынан айыру жазасы күтіп тұр.
Ербол ауруханадан шыққанымен, әлі құлан-таза айыға қойған жоқ. Әзірге протез киюге болмайды. Оның бағасы 10 миллион теңге тұратын көрінеді. Ер басына түскен осындай қысылшаң шақта достары, туыстары, әріптестері демеу көрсетті. Еліміздің әр түкпірінен қолдау білдіріп жатқандар да аз емес.
– Мен жай ғана өмір сүруді қаламаймын. Алдағы мақсатым – үлкен спортқа қайта оралу. Паралимпиялық ойындарға қатысу арқылы бәсекелестігімді, қол-аяғы балғадай спортшылардан кем еместігімді дәлелдеу. Оған ерік-жігерім де, күш-қайратым да, тәжірибем де толық жетеді. Жара жазылып, бабыма келген соң бірден спорт залға тартамын. Жүзумен, джиу-джитсумен, грэпплингпен айналысамын, – дейді Ербол жасқа тән жігерлі үнмен.
Оның үлкен асуларды бағындыра алатынына жаттықтырушысы Ғабит Өтенов те бек сенімді. Өз тағдыры өз қолында екенін қапысыз ұққан Ербол спорт залға барғанша асық.
Өмір ЕСҚАЛИ, «Егемен Қазақстан»
Солтүстік Қазақстан облысы