Астанада 6-7 қазан күндері Бүкіләлемдік ММА қауымдастығының нұсқасы бойынша ММА-дан әлем чемпионаты өтеді.
Орталық коммуникациялар қызметінде өткен баспасөз мәслихатында ММА және каратэ бойынша әлем чемпионы Айдар Махметов алдағы әлем чемпионаты Астанадағы елеулі және кең ауқымды спорттық іс-шараға айналады, дейді.
«Бұл жолы толық жаңартылған құрам өнер көрсетеді. Бүгінде кәсіби шаршы алаңда өнер көрсететін және бұған дейінгі жарыстардың чемпиондары мен жүлдегерлері арасында Сергей Морозовты, Шавкат Рахмоновты, Дәурен Ермековты, Гойти Дазаеваны, Рашида Дагаеваны ерекше атап өтуге болады. Қазақстанның қазіргі құрамасында чемпион атағын жеңіп алуға 21 жастағы Санжар Әділовтің (салмақ дәрежесі 56,7 килоға дейін), 27 жастағы Мәди Райханның (93 кг), бар-жоғы 20 жастағы қос спортшы қызымыздың Зарина Қадырбаева (52,2 кг) мен Мария Агапованың (61,2 кг) жақсы мүмкіндігі бар», деп атап өтті А.Махметов.
ММА-дан Қазақстан құрамасының бас жаттықтырушы Айбек Шоқпытов спортшылар дайындығына кеңінен тоқталды.
«Біздің оқу-жаттығу жиынымыз Ақтөбе қаласында өтті. Барлық спортшылар жеңістен үмітті. Олар әлемдік жарысқа тыңғылықты дайындалды. Спортшыларымыз Астанадағы әлем чемпионатында жақсы нәтижеге көрсететініне сенімдімін. Сонымен қатар туған жерімізде өнер көрсетеміз. Бұл бізге ерекше күш-жігер, қолдау береді және әрбір спортшы үшін маңызды», деді ол.
Бас бапкердің айтуынша, спортшы қыздарымыз да алдағы чемпионатқа тыңғылықты дайындалған. Олардың нәзік жандылар арасында ММА-дан әлем чемпиондары атануға барлық мүмкіндік бар.
Ұлттық құраманың мүшесі Еркінбек Інжелдің сөзінше, қарсыластар осал емес.
«Меніңше, Астанада еліміздің намысын қорғап, жақсы ойын өрнегін көрсетеміз. Оқу-жаттығу жиынында тынымсыз және тыңғылықты дайындалдық. Әрине, Ресейден басқа елдерден келетін мықты спортшылар бар. Бірақ жанкүйерлеріміздің қолдауы арқасында жеңісті қолдан жібермейміз», деген ойын білдірді.
Бұл чемпионатқа әлем бойынша аралас жекпе-жек жанкүйерлерінің назары түспек. Оны тікелей эфирден отандық «QAZSPORT» телеарнасы көрсетеді. Әлемнің түкпір-түкпіріндегі көрермендер ақтық сындарды телеарнаның сайтынан тамашалай алады. Чемпионат туралы арнайы сюжет «Euronews» телеарнасында шығады. Бұл өз кезегінде әлемдегі әуесқой ММА көпшілікке паш етуге жаңа серпін бермек.
ММА бойынша V әлем чемпионатын ММА, панкратион және грепплинг ұлттық федерациясы Астана қаласы әкімдігінің, Ақпарат және коммуникация министрлігінің, «Самұрық-Қазына» АҚ қолдауымен ұйымдастырып отыр.
Чемпионат «Дәулет» спорттық кешенінде өтеді.
Рауан ҚАЙДАР,
«Егемен Қазақстан