Алматының «Халық Арена» спорт кешенінде күрес түрлерінен Олимпиада және әлем чемпионаты жүлдегерлерінің қатысуымен шеберлік сабағы өтті. Шараны Спорттық жекпе-жек және күш қолданылатын спорт түрлері конфедерациясы, Грек-рим, еркін және әйелдер күресі федерациясы, Алматы қаласы №15 балалар мен жасөспірімдер спорт мектебі ұйымдастырды.
Еркін күрестен Атланта Олимпиадасының қола жүлдегері Мәулен Мамыров, грек-рим күресінен Бейжің Олимпиадасының күміс жүлдегері Нұрбақыт Теңізбаев, еркін күрестен Лондон Олимпиадасының қола жүлдегері Ақжүрек Таңатаров, Рио олимпиадасының қола жүлдегері Эльмира Сыздықова, грек-рим күресінен әлем чемпионатының күміс жүлдегері Демеу Жадыраев, Азия чемпионы Ербол Қоңыратов, еркін күрестен Монреаль Олимпиадасының (1976) күміс жүлдегері Александр Иванов 200-ге тарта балғын балуандарға күрестің айла-тәсілдерін түсіндірді. Шараны ұйымдастыруға ұйытқы болған №15 балалар мен жасөспірімдер спорт мектебінің директоры Дастан Қанатхановтың айтуынша, мұндай шеберлік сабағын өткізу жас балуандардың шеберлігін шыңдай түседі.
– Қазіргі таңда Алматыдағы «Халық Арена», «Алматы Арена», «Достық» спорт кешендерінде жас балуандардың күреспен шұғылдануына керемет жағдай жасалған. Спорттық жекпе-жек және күш қолданылатын спорт түрлері конфедерациясы мен Грек-рим, еркін және әйелдер күресі федерациясының қолдауының арқасында жас балуандарымыз аталған спорт кешендерінде тегін жаттығады.
Бүгінгі өткізіп отырған спорттық шарада жас балуандарымыз Олимпиада мен әлем чемпионатының жүлдегерлерінен күрестің айла-тәсілін үйреніп, шеберліктерін шыңдай түсетініне сенімім зор. Болашақта олар да ағалары сияқты ел намысын абыроймен қорғап, көк туымызды көкте желбірететіні сөзсіз, – деді Д.Қанатханов.
Шеберлік сабағының ашылу салтанатында жас балуандар атақты балуандармен қатар тұрып, Қазақстан Республикасының Әнұранын тыңдады. Артынша, кезек-кезегімен кілемге шығып, әр балуан өздерінің сүйікті әдіс-тәсілдерінің қыр-сырын көрсетті. Спорттық шараның соңында жас балуандар атақты балуандардан қолтаңба алып, естелік суретке түсті.
Бұдан кейін Грек-рим, еркін және әйелдер күресі федерациясының төрешілер корпусы және бапкерлер штабының жұмысы жөніндегі вице-президенті Ерлан Қожасбай шеберлік сабағына қатысқан балуандарды «Меркурий Медет» спорттық-сауықтыру кешенінде орналасқан Күрес академиясына бастап барды. Ол жерде балуандар академияның тыныс-тіршілігімен танысты. Еркін күрестен Атланта Олимпиадасының қола жүлдегері Мәулен Мамыров академия қабырғасында тәлім алып жатқан жас балуандарға ақ жол тіледі.
Еркебұлан ЖОМАРТ,
журналист