Кеше Алматыда «Қазақстан» атты монументті-мүсіндік композиция ашылды
Қазақстан Республикасының Тұңғыш Президенті атындағы саябақта «екі қанатын» керген ескерткіш қола мен граниттен және мәрмәр тастан жасалған. Композиция ортасында Қазақстан Республикасының Тұңғыш Президентінің еңселі мүсіні бар. Қос қанатта Астана мен Алматы бейнеленген.
Қараша болса да жаймашуақтанған күнде ескерткіштің ашылуына ел зиялыларынан бастап мыңға тарта алматылықтар қатысты. Елдігіміз үшін есте қаларлық салтанатты оқиға барысында қала әкімі Ахметжан Есімов сөз алып, егемен елдің аз ғана уақытта қол жеткізген сүбелі табыстарын атап шықты.
Жоба авторларының бірі, Қазақстанның Қала құрылысшылары одағының президенті Любовь Нысанбаева егемен елдің дәл бүгінгідей еңсесін тіктеуге Елбасының сіңірген еңбегі орасан зор екенін, қиын кезеңдерді бірге өткерген Мемлекет басшысын өз замандастары бағалап, өз кезеңі бағалауы керектігін тілге тиек етті.
Осы арада «ҚР Тұңғыш Президенті туралы» Конституциялық заңның 9-бабына сәйкес, үстіміздегі жылы қала құрылысы, архитекторлар, дизайнерлер мен суретшілер одақтары «Қазақстан» атты монументті-мүсіндік композиция орнату туралы бастама көтергенін еске сала кетелік. Осылайша ауызбірлік танытқан шығармашылық одақтар аз ғана уақыт ішінде өз қаражатына тамаша ескерткішті орнатып үлгеріпті.
Қасиетті жұмаға сәйкес келген салтанатта Парламент Сенатының Халықаралық қатынастар, қорғаныс және қауіпсіздік комитетінің төрағасы Қуаныш Сұлтанов халық ойындағы сөзді төмендегідей тарқатты:
– Тарихтың талай тәпсірін басынан өткізген Алматы өзінің шынайы ұлттық нышанын, болмысын, рухани мазмұнын, кескін-келбетін еліміз тәуелсіз мемлекет дәрежесіндегі 20 жылда айрықша сезіне бастады. Алматының көшелеріне, саябақтарына, алаңдарына қазақ халқының ардақты тұлғаларының – мемлекет, қоғам, өнер, ғылым, мәдениет қайраткерлерінің есімдері берілуі, оларға ескерткіш орнатылуы, қазақ тілінің жаңғыруы – ұрпақтың ұлттық санасын оятып, еліміздің тарихын танытуға мол ықпал етуде. Алматы – ең қасиетті құндылығымыз – Тәуелсіздігімізді жариялап, ұлттың азаттық туын көтерген Тәуелсіздігіміздің алтын бесігі.
Алматы – ұлттық рух, халықтық бірлігімізді тұтастырып, еңсемізді көтеріп, өркениет жорығын бастаған Тәуелсіз мемлекеттің Тұңғыш Президентін сайлаған Асыл Орда.
Осы Алматыда біздің Президенттің бастамасымен Тәуелсіз Мемлекеттер Достастығы, Азиядағы өзара сенім шаралары жөніндегі кеңес, тағы басқа халықаралық ұйымдар құрылды.
Тұңғыш Президент, Елбасының туған елінің дүниежүзілік қоғамдастықта еңсесі биік ел болып танылуына күш салып, әлемнің назарын қазаққа аударып, ісін көрсетіп, сөзін тыңдатып, ақылын мойындатып, жаңа дәуір тұсында халқымыздың тұрмыс, әлеуетінің өсіп-өркендеуі үшін ең маңызды шешімдер қабылдап, оны жүзеге асырып, көркейгенін көрген жер.
Алматы – Нұрсұлтан Назарбаевтың «ғасыр жобасы» деген мәртебеге ие болған Қазақстанның орталық өңірінің төсіне Тәуелсіз мемлекетіміздің жаңа астанасын салу идеясын толғатып, жарыққа шығарып, халыққа жаратқан жасампаз қала.
Нұрсұлтан Әбішұлы Назарбаев жаңа дәуірдегі Жаңа Қазақстан мемлекетінің негізін қалыптастырып, іргетасын қалап, қабырғасын тұрғызып, шаңырағын көтеріп, шекарасын бекітті. Қазақты әлемге танытты, мойындатты. Елімізде көп ұлттың, көп діннің басын біріктіріп, татулық орнатып, қоғамдық келісімге келтіріп, тәуелсіз мемлекет мүддесіне жұмылдыра білді. Салиқалы сыртқы саясаты, салмақты бастамашыл қағидаттары арқылы дүниежүзілік қоғамдастықта Қазақстанның беделін мейлінше биікке көтерді. Әлемнің ең беделді жоғары дәрежедегі кездесу, жиындарында біздің Елбасының сөзі тың ойымен, орынды ұсыныстарымен ерекшеленеді.
Алматы қаласында ашылған скульптуралық композиция – Тәуелсіз мемлекетіміздің символы, Нұрсұлтан Әбішұлының мемлекет, ұлт алдындағы қыруар еңбегіне, мемлекеттік қайраткерлігіне берілген әділ баға, тарихи таным деп қабылдағанымыз орынды.
Еңселі ескерткіш ел Тәуелсіздігінің 20 жылдығына арналып отыр. Талай замандар өтер, бүгінгі күндер де тарих қойнауына кетер, ал «Қазақстан» композициясы, сенатор атап көрсеткендей, тәуелсіз Қазақ мемлекетін құрып, оның іргесін нығайтқан Елбасының еңбегін келер ұрпаққа жеткізер елдіктің ерен ескерткіші болып қала бермек.
Айнаш ЕСАЛИ.
Алматы.