Премьер-Министр Кәрім Мәсімовтің төрағалығымен кеше Үкіметте өткен селекторлық кеңесте екі мәселе қаралды. Оның біріншісі – көп пәтерлі тұрғын үйлерді жөндеудің тетіктерін жүзеге асыру барысы туралы еліміздің Құрылыс және тұрғын үй-коммуналдық шаруашылық істері агенттігінің төрағасы Серік Нокин баяндады.
Оның айтуы бойынша, аталған мәселе жөнінде қазіргі күні екі тетік әзірленіп, жүзеге асырылуда. Біріншісіне Үкімет қорынан 1,9 миллиард теңге бөлінген. Бұл қаржыға 106 үйді жөндеуден өткізу жоспарланып отыр.
Үстіміздегі жылдың 11 қарашасындағы мәлімет бойынша, осы бағыттағы жөндеу жұмыстары еліміздің 16 өңіріндегі 91 тұрғын үйде қолға алынды. Бұл жалпы көрсеткіштің 86 пайызын құрайды. Бөлінген қаржының 950 миллион теңгесі немесе 50 пайызы игерілді. Ақтөбе облысы мен Астана қаласында бөлінген қаржы толықтай игерілді. Атырау, Оңтүстік Қазақстан облыстарында да жұмыс қызу қарқынмен жүзеге асырылуда.
Екінші тетікті жүзеге асыруға Үкімет 5,5 миллиард теңге бөлген болатын. Бұған 449 үй жөндеуден өткізілуге тиіс. Қазіргі күні осы тетік бойынша жұмыстар еліміздің барлық өңірлеріндегі 402 тұрғын үйде жүзеге асырылуда. Бұл жалпының 89 пайызын құрайды. Бөлінген қаржының 3,9 миллиард теңгесі немесе 67 пайызы игерілді.
Күн тәртібіндегі екінші мәселе бойынша қысқы жылыту маусымына дайындық жұмыстарының нәтижелері қаралды. Осы мәселеге қатысты ескеретін бірқатар проблемалар анықталып, оларды жоюдың жолдары белгіленді. Мұнай және газ вице-министрі Берік Толымбаевтың хабарлауына қарағанда, еліміздің оңтүстік облыстарын газбен қамту ісінде бірқатар іркілістер орын алды. Бұған Өзбекстаннан елімізге жеткізілетін газ көлемінің төмендеуі әсер етіп отыр. Осыған байланысты Қазақстан енді Түркіменстан газын алуға кірісті. Сөйтіп, проблема шешімін тапты.
Аталған мәселелерді қорытындылаған Үкімет басшысы Кәрім Мәсімов мәселеге жауап беретін адамдарға мұндай маңызды істерді күні бұрын қолға алып, алдын-ала жүргізу қажеттігін ескертті. Сонымен қатар мәселелерді тыңғылықты реттеу жөнінде тиісті орындарға тапсырмалар берді.
Сұңғат ӘЛІПБАЙ.