Кеше Парламент Сенатының Төрағасы Қайрат Мәми Иранның Қазақстандағы Төтенше және өкілетті елшісі Горбан Сейфиді қабылдады, деп хабарлады Парламент Сенатының баспасөз қызметі.
Кездесу барысында Қазақстан мен Иранның екіжақты қарым-қатынастарын одан әрі дамыту мәселелері талқыланды. «Қазақстан Иранмен достық және өзара тиімді байланыстарды дамытуға ерекше маңыз береді», – деді Қ.Мәми. Төрағаның айтуынша, екі мемлекеттің басшылары экономикалық және саяси салалардағы өзара тиімді екіжақты ынтымақтастықты одан әрі ілгерілетуге баса назар аударып келеді.
Иран Ислам Республикасы Парламентінің Төрағасы Али Лариджанидің былтырғы жылғы Қазақстанға ресми сапары қорытындыларын жоғары бағалай келіп, Қ.Мәми «парламентаралық байланыстар тұтастай табысты дамып келеді, сонымен бірге оны тереңдетудің мүмкіндігі зор», – деп атап өтті.
Г.Сейфи қазақстандық тарапты еліміз тәуелсіздігінің алдағы 20 жылдығымен құттықтады және ИИР Парламентінің Төрағасы Али Лариджанидің Иранға ресми сапармен келуге шақыруын Қ.Мәмиге жеткізді. «Сіздің ИИР-ға сапарыңыз парламентаралық өзара іс-қимылға жаңа серпін беретін болады», – деді елші сөзінің қорытындысында.