Алматыда «Нұр Отан» халықтық-демократиялық партиясының қалалық филиалы саяси кеңесінің кеңейтілген отырысы болып өтті. Онда «Нұр Отан» ХДП Алматы қалалық филиалының төрағасы Ахметжан Есімов сөз сөйледі.
Саяси кеңес отырысының күн тәртібіне бүгінгі таңдағы өзекті мәселелердің бірі – партияның сайлауалды тұғырнамасы шығарылып, жан-жақты талқыланды. Сондай-ақ, бірқатар пікірлер мен ұсыныстар ортаға салынды. «Нұр Отан» ХДП-ның кезектен тыс өтетін XIV съезіне қатысатын делегаттарды сайлау және партияға жаңа мүшелерді қабылдау жүзеге асырылды.
Көпшілікке белгілі, қазақстандықтардың сеніміне ие болған «Нұр Отан» партиясының негізін мемлекетіміздің тұрғындары құрайды десек, ал партияның күші олардың, яғни халқымыздың мәдени және рухани әл-ауқаты болып табылатындығы айтпаса да түсінікті. Міне, осындай басты себептен партия өз қатарын тәуелсіздігіне жиырма жыл толған мемлекеттің одан әрі дамып, өркендеуіне лайықты үлес қосатын азаматтармен және танымал әрі беделді тұлғалармен толықтыруды басты мақсатқа айналдыруы құптарлық жәйт.
Партия ұйымдарының сайлауалды тұғырнамасының жобасы Мемлекет басшысы, «Нұр Отан» партиясының Төрағасы Нұрсұлтан Назарбаев ұсынған еліміздің 2020 жылға дейінгі Стратегиялық даму жоспарын тиімділікпен жүзеге асырудағы міндеттерге негізделген. Бұл орайда, ең басты назар қазақстандықтардың өмір сапасын жақсартуға, денсаулық сақтау мен білім беру салаларын одан әрі жетілдіруге аударылып отыр. Сонымен қатар, қазақ халқының және елімізде қоныстанған өзге де ұлттардың мәдениеті мен салт-дәстүрін сақтап, дамыту қажет. «Нұр Отан» ХДП Алматы қалалық филиалының төрағасы, қала әкімі Ахметжан Есімовтің айтуынша, «партия мүшелері ұлтаралық және конфессияаралық келісім мен ұлттар арасындағы ынтымақты, достықты сақтап, оны одан әрі нығайтуға өз тарапынан ықпал етуі қажет».
«Нұр Отан» ХДП-ның Алматы қалалық филиалының кеңейтілген басқосуында сөз алған партияның республикалық Саяси кеңесі бюросының мүшесі Александр Павловтың айтуынша, «оңтүстік астананың өндірістік көрсеткіштері, бұл бағыттағы тәжірибесі айтарлықтай».
– Ұлан-байтақ еліміздің әлеуметтік-экономикалық дамуына алматылықтардың қомақты үлес қосып отырғандығы анық. Соған орай, Алматы қаласындағы партияның 72 мыңға жуық мүшесі партияның алға қойған мақсаттары мен міндеттерін кеңінен насихаттаулары қажет екендігін айтқым келеді. Ұлт көшбасшысы Нұрсұлтан Назарбаевтың сарабдал саясатының нәтижесінде Тәуелсіздігіне небәрі жиырма жыл ғана толған мемлекетіміз әлемге танылып, уақыт өткен сайын көркейе түсуде. Болашаққа бағытталған қазақстандық жолдың келешегінің де кемел болатынына сенім мол, – деді Александр Павлов.
Кеңейтілген жиында партияның кезектен тыс өтетін XIV съезіне делегаттар сайланды. «Нұр Отан» ХДП сайлауалды тұғырнамасының жобасы партияның Алматы қалалық филиалының саяси кеңесінің басқосуында бірауыздан мақұлданды. Жиын соңында партия қатарына қабылданғандарға партия билеттері салтанатты түрде тапсырылды. Олардың арасында Мемлекеттік сыйлықтың лауреаты ел Туының авторы Шәкен Ниязбеков, соғыс және еңбек ардагері Сұлтан Жиенбаев, халық әртісі Ескендір Хасанғалиев және басқалар бар.
Бақыт БАЛҒАРИНА.
Алматы.