Халықаралық ана тілі күні шеңберінде Матья Губица атындағы Загреб мектебінде қазақ тілінің қазіргі заманғы дамуына және Қазақстанда латын әліпбиінің енгізілуіне арналған мәдени іс-шара өтті.
Хорватиядағы Қазақстан елшілігі мектептің студенттері мен оқытушылары үшін «Латын әліпбиіндегі қазақ тілі» тақырыбында ашық сабақ, Абай Құнанбаев поэмалары мен Шәмші Қалдаяқов әндерінің тұсаукесерін ұйымдастырып, Қазақстанның жетістіктері туралы бейнеролик көрсетті.
Іс-шара барысында қазақ ауыз әдебиетінің ерекше дәстүрлері – ақындардың өнері, фольклоры мен эпосы, сондай-ақ, әдеби, ақындық және философиялық мұрасы атап өтілді. Бұл тұрғыда Қазақстан басшылығының ана тілін және мәдениетін сақтау, оны дамыту жөніндегі қабылданған шараларының маңыздылығы баса айтылды. Президент Нұрсұлтан Назарбаевтың бастамасымен ұсынылған «Рухани жаңғыру» бағдарламасының жүзеге асырылуы және қазақ әліпбиін латын әрпіне көшіру Қазақстанның лингвистикалық, мәдени және рухани дамуын жаңа белеске шығаратыны туралы айтылды.
Халықаралық ана тілі күні 1999 жылы ЮНЕСКО-ның бастамасымен жарияланды және жыл сайын 21 ақпанда әлемдік тіл және мәдени дәстүрлерін дамыту мақсатында аталып өтеді.
«Егемен-ақпарат»