Әлсізге көмектескеннің сауабы үлкен

– Қайрат Орынбайұлы, бұл қорды не мақсатпен құрдыңыздар және немен айналысады?

– «Уақып» қоры коммер­циялық емес қа­йырымдылық көрсететін ұйым. Негіз­гі миссиясы – жеке және заңды тұл­ға­лар тарапынан жиналған қаржы­мен қайырымдылық жасап, әлеу­меттік жобаларды қолдау. Мақ­сатымыз – аз қамтылған отба­сыларға материалдық көмек көр­сету, бұқараның діни сауатын арттыруға көмектесу, радика­лизм мен діни экстремизмнің алдын алу, діни мекемелер мен оның қызметкерлерін қолдау.

– Қор өткен жылдың шілде айында тіркеліпті. Содан бері қандай жұмыстар атқарылды?

– Еліміздегі діни қызмет­керлерді қолдау қордың басты бағыты дегенді жаңа айттық. Өйткені, діни қыз­меткерлер бюд­жеттен айлық алмайды. Әсі­ресе, шалғай ауыл имамдары қаржыға мұқтаж. Қор осы орайда, алыс ауылдарда тұратын 250 діни қыз­меткерге, теріс ағыммен күресуші тео­логтарға жалпы сомасы 31 миллион теңгелік әлеуметтік көмек көрсетіп, 90 діни қызметкерді экстремизм мен радикализмге қарсы біліктілік арттыру курсына жіберді. Бұл жұмыс әлі де жалғасын табады.

Бұның сыртында ҚМДБ жанындағы имамдардың білімін жетілдіру ислам институтына 16 миллион теңге көлемінде көмек көрсетілді. Ақтөбе қаласының мешітіне «Hyundai Creta» жеңіл көлігі берілді. Кедей отбасылардан шыққан бес студентке «Нұр-Мүбарак» университетінде білім алу үшін қаржылай көмек берілді.

Ұлттық спорт түрлерін наси­хат­тау мақсатында өткен жыл­д­ың қазан айында Жамбыл об­лы­сының Қордай ауданында қазақ күресінен, қараша айында Оң­түстік Қазақстан облысын­да то­ғызқұмалақтан турнир өткіздік.

Жақында Қазақстан Респуб­лика­сы Кәсіподақтар фед­ера­ция­­сының төрағасы Бақыт­жан Әбдірайымовпен кезде­сіп, Фе­дерация тарапынан дін қыз­меткерлеріне еліміздегі де­малыс орындарына жеңілдікпен жолдама беру мәселесін шештік.

Келесі бір атап өтуге тұра­тын дүние – қор бастамасымен жастар­дың адам­гершілік қабі­летін арттыру­ға бағытталған әлеу­меттік роликтер әзірленіп, «Қайран өмір» атты қысқа метражды фильм түсір­дік. Осының жал­ғасы ретінде дәс­түрлі ислам құн­дылық­тарын және ата-баба мұра­ларын наси­хаттауға арналған то­лық метражды фильмнің түсі­рілімі жүріп жатыр.

Елордалықтар үшін жағымды жаңа­лық: өткен жылы Астана қаласы Петров көшесінде орна­лас­қан «Сұлтан» сауда орталы­ғында зейнеткерлер мен мұқтаж жан­дарға сүт пен нан тегін тара­тыл­ған еді. Бұл акция биыл да жалға­сын тауып, әр аптаның жұма күні сағат 12:00-15:00 арасында өткізілуде.

– Сіз адам қуанарлық мәлі­­мет­тер айттыңыз. Құтты болсын! Қор арқылы қайы­рымдылық жасауға ниет еткен азаматтар болса қаржысын қалай аудара алады?

– Қорға қаржыны аударудың бірнеше жолы бар. Әуелі «Қазақстан халық банкі» АҚ-та ашылған есеп-шотқа жолдай алады. Тиісті реквизиттер қордың ресми сайтында (www.waqyp.kz) тұр. Сонымен қатар қор кассасына барлық қоғамдық орындарда орналасқан QIWI терминалдары арқылы аударуға болады. Мұнан бөлек қордың мобильді қосымшасы жасалуда. Осы жүйе арқылы онлайн режімде ақша аудара аласыз.

– Өткен жылдың соңында қор Ақтөбе қаласындағы колледж-медресе құрылысына қатысқаны жайлы хабардармыз. Осы жобаны іске асыруда қандай жұмыстар атқарылды?

– Шын мәнінде бұл еліміз үшін өте қажет жоба-тын. Қала әкімдігі сіз айтып отырған білім ордасының құрылысына бес гектар жер бөліп, құрылысын 2020-2021 жылдарға қарай аяқтау жоспарланыпты. Бірақ колледж-медресе Білім және ғылым министрлігі тарапынан білім беру лицензиясын әлдеқашан алған екен. Біздің қор білім ордасы аумағында діни қызметкерлер мен мұқтаж жандарға арнап, төрт подъезден құралған үй салмақпыз. Жұмыс сәтті жүріп жатса, мұндай жобаларды Астана және Алматы қалалары, Қызылорда облысында іске асыру жоспарланып отыр.

– Қордың қаржылық бақылау тетігі қалай ойластырылған?

– Жұмыс барысында қолдағы қар­жыға тұрақты түрде мониторинг жүр­гізіліп, қайырымдылық шаралары­ның тиімділігі және қаржының тиімділігі бақыланып отырады. Бұл жұмысты қордың менеджерлері өңірдегі дін істері басқармалары және діни бірлестік өкіл­дерімен бірлесіп жүргізеді.

Әңгімелескен

Бекен ҚАЙРАТҰЛЫ,  «Егемен Қазақстан»