Қазіргі уақытта Мәжілісте Парламент депутаттары бастамашылық жасаған «Газ және газбен жабдықтау туралы» Қазақстан Республикасының Заңына өзгерістер мен толықтырулар енгізу туралы» заң жобасы қарастырылуда.
Аталған заң жобасымен жұмыс барысында газбен жабдықтау жүйесі объектілерінің қауіпсіз пайдаланылуын қамтамасыз ету мәселелері газ нарығы субъектілерінің үлкен алаңдаушылығын туғызып отыр.
2014 жылы өнеркәсіптік қауіпсіздік саласындағы уәкілетті органның тұрмыстық баллондар мен газбен жабдықтау жүйелері объектілерін қауіпсіз пайдалану талаптарының сақталуына бақылау жүргізу жөніндегі құзыреті алып тасталған болатын. Осының салдарынан газ нарығы субъектілерінің қауіпсіздік талаптарын сақтауына бақылау жүргізу мүлдем жоғалды. Бақылау жоқтықтың кесірінен тек соңғы бір жылда ғана Қазақстанда 91 рет газ баллондары жарылып, соның кесірінен 9 адам қаза тауып, 100 адам зардап шеккен.
Қазіргі уақытта Үкімет газбен жабдықтау жүйелерінің объектілерін қауіпсіз пайдалану мәселесін шешу үшін тиісінше өкілеттіктерді тұрғын үй инспекцияларына жүктеуді жоспарлап отыр.
Алайда қауіпсіздік мәселелері газ тұтынушы жүйелер мен тұрмыстық және коммуналдық-тұрмыстық тұтынушылардың газ жабдықтарына қатысты ғана емес, кешенді түрде шешілуі қажет екенін тәжірибе көрсетіп отыр. Тұрғын үй инспекцияларының өкілеттіктері газ құбырлары, газ толтыру пункті және автогаз құю стансасы сияқты объектілерді бақылауға жеткілікті болмайтыны сөзсіз. Яғни, проблема бұл жерде біржақты ғана шешілетін болады және азаматтар үшін алғашқы қауіп көздері назардан тыс қалады.
Осыған байланысты, біз өнеркәсіптік қауіпсіздік саласындағы уәкілетті органның немесе жергілікті атқарушы органдардың жанынан газ-техникалық инспекцияларын құруға бағытталған жедел шаралар қабылдау қажет екенін айтып, Үкімет басшысы Б.Сағынтаевқа депутаттық сауал жолдадық. Егер осындай құрылым жарақталса тұрмыстық баллондарды және газбен жабдықтау жүйелерінің объектілерін қауіпсіз пайдалану талаптарының сақталуына бақылауды жүзеге асыратын болар еді.
Шавхат ӨТЕМІСОВ, Мәжіліс депутаты