Елбасымыз Қазақстан Республикасы Парламенті палаталарының біріккен отырысында бес бастаманы алға тартты. Аталмыш бес бастаманың барлығы да қарапайым халыққа яғни әлеуметтік салаға бағытталған.
Егер онда көрсетілген жұмыстар уақтылы және толықтай жүргізілсе, Отанымызда оң өзгерістер көп болмақ. Мысалы, қазір халықтың басым бөлігі мемлекеттен тегін баспана алуға кезекте тұр. Менің ойымша, қол қусырып күтіп отырғанша, халықтың өз бетінше әрекет етуін жетілдіру қажет. Осылайша, Президентіміз атап өткен «7 – 20 – 25» бағдарламасы бүкіл елге қажетті бастама деп білемін. Әлемдегі кез келген елде өз азаматтарын тұрғын үймен қамтамасыз етуге арналған мұндай бағдарлама мен жеңілдіктер қарастырылмаған.
Қазақстан – жас мемлекет ретінде әрбір азаматы үшін қолдан келген жақсылығын жасап, басқа қатарлас, көршілес мемлекеттермен салыстырғанда, оқ бойы озық шығып отыр.
Әлемдік статистикаға көз жүгіртсек, өз резиденттеріне арналған ипотека бойынша ең төменгі мөлшерлеме Жапония, Швейцария, Финляндия, Германия, Люксембург сынды көптеген дамыған елдердің тәжірибесінде кездеседі. Бұл мемлекеттерде тұрғын үйдің бағасы қымбат болғандықтан, оны сатып алу халыққа қиындық туғызады. Осыған қарамастан, ипотекалық кредит алуға төменгі пайыздық мөлшерлемелер мен төлеудің ұзақ мерзімдері бекітілген.
Менің пікірімше, біздің Үкімет те жоғарыда аталған мемлекеттердің тәжірибесін басты назарда ұстап, еліміздің қазіргі экономикалық жағдайына орай халыққа қолайлы шарттарды ұсынуға тырысып отыр. Әрине ел азаматы ретінде, мені жоғары лауазымдағы тұлғалардың қарапайым халықтың жағдайын ойлауы және олардың өмірін жақсартуға талпынғандығы бек қуантады. Жақын арада тұрғын үймен қамтылған бақытты отбасылардың саны бірнеше есе өседі деп үміттенемін.
Жәмилә МЕҢДІБАЙҚЫЗЫ, «Күміс алқа» иегері
Маңғыстау облысы