«Егеменді Қазақстанның» 1991 жылғы 3-12 желтоқсан аралығындағы нөмірлерінен топтама.
Нұрсұлтан Назарбаев – Қазақстанның халық сайлаған президенті
Бүкіл халық оны ақ киізге көтеріп, Ақ Ордаға отырғызды
«Егемен Қазақстанның» 1991 жылғы 3 желтоқсандағы нөмірі осындай тақырыппен ашылған. Бұл нөмірде «Белді будық! Тәуекел дедік!» деген тақырыппен Нұрсұлтан Әбішұлы Назарбаевтың өзін Қазақстан халқы Президент сайлағаннан кейін өткізген алғашқы баспасөз конференциясынан репортаж және «Президентті осылай сайладық» деген тақырыппен Қазақстанның облыстары мен қалаларында сайлаудың қалай өткендігі жөнінде газеттің меншікті тілшілерінің хабарлары берілген. Президенттің алғашқы баспасөз конференциясы Алматыдағы достық үйінде ұйымдастырылған екен. «Осы жерде талай жылы-жүзді кездесу өтсе де, бүгінгінің жөні бөлек. Қазақ баспасөзі, Қазақстан журналистері, одақтық баспасөздің Қазақстанда тіркелген өкілдері және шетел тілшілері бұл жолы Нұрсұлтан Әбішұлына сұрақ беруші ретінде емес, тілеуқор ретінде де келді десек, өтірік айтпаспыз. Өйткені, Орталық сайлау комиссиясының төрағасы Қапер Бөкенов: «Дауыс беруге республикадағы барлық сайлаушылардың 88,24 проценті қатысты, дауыс бергендердің 98,76 проценті Нұрсұлтан Назарбаевтың кандидатурасын жақтады» деп мәлімдегенде, қол соқпаған журналист жоқ. Өзінің ақылды саясатымен терең ойларымен және жеті өлшеп, бір кесілген шешімдерімен үлкен беделге ие болған Қазақстан Президенті – журналистердің де қуана жолығатын адамы. Вице-президент болып Е.М.Асанбаев сайланды, оның кандидатурасын Мемлекет басшысының өзі ұсынған болатын» деп басталыпты тарихи сәттен сыр шерткен бұл репортаж. Халық сайлаған Президент өз сөзінде қазақ халқына, Қазақстан халқына, өзіне тілектес болған барлық адамдарға, егеменді мемлекеттердің бақылаушыларына, журналистер қауымына рақмет айтыпты. Сайлау қорытындысы өзіне жауапкершілік жүктейтінін, тұрғындардың 99 проценттен астамы дауыс берген Теміртау, Ленинск сияқты жайшылықта кез келген адамға дауыс бере қоймайтын күрделі қалалардың сенімін ризалықпен атап өткен. Өзінің енді нарық қатынастарына көшуге, экономикадағы жағдайды жөндеуге белсене кірісетінін мәлімдепті. «Егеменді Қазақстан» газетінің тілшісі: «Халқыңыз Сізді ақ киізге көтеріп, Ақ Ордаға қайтадан отырғызды. Сізге ақ жол тілейміз. Бірінші жарлықты неден бастайсыз? Одан кейін Орта Азия мен Қазақстан аймағының бірлігі үшін біраз әрекет жасадыңыз. Осы тіршіліктің жалғасы қалай болады?» деп сұрақ қойыпты. Бұл сұраққа Президент: «Сайлаудың соңын күтпей-ақ бірнеше Жарлықтар әзірлегенмін. Солар жарық көреді. Ең алдымен, бюджеттен жалақы алатын халықтың жағдайын ойлаймын. Солардың жалақысын арттыру жөнінде жарлық беріледі. Өйткені, кәсіпорындар еркін жалақыға көшкен жағдайда бюджеттік мекемелерде қызмет істейтін қазақстандықтар нарық қыспағанда қалып қоймауы керек. Орта Азия республикаларымен кездесулер болып жатыр. Соңғысы Ташкентте өтті. Түбі бір халықтармен байланыс нығаяды. Сондай-ақ мұсылман әлемімен байланыс жақсарады. Мені Араб елдері лигасына шақырып отыр» деп жауап беріпті.